Фрчковски имаш ли коментар за Глигоров 1995-та?

“Изнесените искази на сведокот кој тврдеше дека ја направил фотографијата од „автомобилот бомба - ами 6“  се покажаа како невистинити“, рече на денешната прес-конференција државниот јавен обвинител Љупчо Шврговски.

МВР обезбедило доказни средства кои недвосмислено укажуваат дека сведокот не ја направил фотографијата која подоцна беше објавувана во медиумите. Фотографијата била добиена од германскиот турист, професор Хајнц Херпих, кој во тој период престојувал во службена посета на Македонија на покана од свои колеги од МАНУ.  Професорот покрај оваа фотографија имал изработено уште 64 други фотографии од цела Македонија.Дека се работи за оригинална фотографија, како што рече Шврговски, покажува негативот од филмот, кој е евтин, се употребува за турисички цели и никогаш не се продавал во Македонија.

Фотографијата од германскиот професор во оперативата на ДБК стигнала во средината на декември 1995 година. Преку амбасадорот на Македонија во Германија била побарана асистенција и преку нивната Служба за безбедност се обезбедени овие фотографии во оригинал со негативот, со што е утврдено дека фотографиите ги направил германскиот турист.МВР извршило разговор со девет лица, анализа и вештачење на целокупната добиена документација.

“Сведокот тврдеше дека во неврзан разговор дознал оти негов колега вработен во СДБ непосредно пред атентатот купил возило „Ами 6“ со непозната боја за роднина од Алексинац. Ова тврдење беше проверено во два наврата, но продавачите на автомобилот во својот исказ воопшто не го препознаваат лицето кое беше посочено од сведокот како лице кое го купило автомобилот“, рече Шврговски.

Според тврдењата на сведокот, не постои германски турист, туку сведокот по наредба на свој претпоставен го фотографирал местото на настанот, а подоцна филмот за изработка на фотографии го предал на лице вработено во Крим - техника во МВР, кое ги изработило фотографиите и заедно со филмот му го предал на сведокот.

- Ова беше клучно прашање и можеби единствена нитка, која доколку се докажеше ќе сугерираше дека постои навистина барем потајна вмешаност на СДБ во логистицирање при извршување на атентатот, истакна Шврговски и додава дека не се знаат мотивите што го инспирирале сведокот да изнесе невистини и оти за тоа ќе се соочи со последици според законот.

На прашањето зошто не е отворена истрага за атентатот 13 години, Шврговски рече дека тоа не е сторено затоа што нема познат сторител на кривично дело. “Законска обврска на Јавното обвинителство е да продолжи да го истражува атентатот, за што го има ангажирано обвинителот Марко Зврлевски“, рече Шврговски.