Каква е користа од Македонците во странство?

	Коментари (9)

Македонија во иднина ќе мора да го распродава државниот имот за да се раздолжи. Ако продолжи ова ударничко темпо на задолжување, домашната економија тешко ќе успее да произведе толку, за Владата да ги враќа старите долгови, алармираат експертите.

„Тоа ви е исто ако во домашниот буџет земете кредит и ако трошите тој кредит на кола, на намештај и друго, ќе се доведете до ситуација да морате да го вратите долгот и со тоа одите во банкрот, при што губите дел од капиталот од државата.

- Тогаш ќе мораме да приватизираме ЕЛЕМ, втората опција ќе биде да ги продадеме остатокот од акциите на телекомуникациите“, рече Рубин Заревски, консултант.

Од 240 милиони евра, колку што е сега годишната рата за отплата на долговите, сумата може да се удвои до половина милијарда евра, а ќе растат и каматите.

Речиси сите економисти се согласуваат дека задолжувањето е опасно, зошто досега позајмено се трошеше непродуктивно, на плати, пензии, споменици.

„Доколку го употребите за трошоци, поготово кои не се поврзани со одредени стопански активности, тогаш тоа е непродуктивно трошење и задолжување на државата.

- Тогаш имаме крајно непродуктивни трендови кои што сигурно во наредните години, не само што ќе мораме да отплаќаме половина милијарда евра, 500 милиони евра на годишно ниво за тој долг.

- Не само што ќе мораме да плаќаме околу 70 милиони евра камати за ова надворешно задолжување, прашање е од која економија ние тоа ќе го плаќаме. Ние ќе мораме да се задолжуваме да ги плаќаме кредитите, а каматата ќе дојде како дополнителен трошок“, вели Заревски.

Додека експертите гласно предупредуваат на опасноста власта да се расфрла со позајмените пари, Владата месецов ги ситни 220 милиони евра од ММФ, јавноста остана глува колку од овие пари завршија за капитални проекти, колку проголта предизборието.

Но и овие пари ќе се книжат како јавен долг. Власта од неодамна престана да ги објавува податоците за тоа колку должи Владата, општините и јавните претпријатија или колкав е вкупниот јавен долг.

Сумата континуирано расте од 2008-ма, тогаш јавниот долг е 28,8 проценти од БДП, во 2009-та 32,11%, во 2010 33,5 % сега најверојатно 34,5 проценти од брутодомашниот производ.