Планината Баба, со врвот Пелистер се наоѓа на јужниот дел од Република Македонија и е со алпски карактеристики. Пелистер е поставен меѓу долините на Пелагонија и Преспа. Стар е околу 465 милиони години. Пелистер е највисокиот врв на Баба Планина, а со своите 2601 метри надморска височина, претставува трет највисок планински врв во Македонија. Името на врвот Пелистер, се користи и како име за самата Баба Планина, но и како синоним за градот Битола.

Постојат две легенди прврзани со името Пелистер. Едни велат дека името потекнува од грчкиот збор „peristeri” што значи гулаб, заради белосивиот камењар, кој кога го гледате од далечина заликува на гулаб. Други пак веруваат дека тоа е од петоигличниот бор – петлистер, па од таму – „Пелистер“.

Пелистер стана Национален парк на 30-ти ноември 1948 година, кога е прогласен за прво заштитено природно богатство во Р.Македонија. Овој Национален парк го опфаќа врвот Пелистер и се протега на падините на Баба Планина, а од градот Битола е оддалечен 15km. Неговата површина изнесува 12.500 хектари, со надморска височина од 700 до 2.600 метри.

Националниот парк Пелистер се карактеризира со поголем број врвови и повеќе возвишенија повисоки од 2000 метри, кои меѓу себе се раздвоени со длабоки долини. Од релјефните облици највпечатливи се т.н. „камени реки“.Тоа се всушност наклони на релјефот исполнети со дробински материјал, составен од блокови на гранити, долерити, габрови и кварцни шкрилци, натрупани едни врз други, без ориентација. Тие се создадени во времето кога во највисоките делови на планината имало снежна клима, со лизгање на блоковскиот материјал по подлогата, поради нејзиното наизменично замрзнување и одмрзнување. Камените реки се најизразени на северната страна на возвишението Црвена Стена и над месноста „Копанки“. На одделни места на Пелистер, камените реки сочинуваат низа долга и до 3км. Исто така, непомалку интересна појава на Пелистер се и т.н. „камени мориња“. Овие маркантни периглацијални релјефни форми настануваат со мразно раздробување на карпестата подлога, која што обично е со благ наклон, така што разорениот карпест материјал останува на самото место на создавањето. Класична појава на едно вакво море од камења може да се види на североисточната страна од врвот Пелистер, во правец на врвот Стив.

Национален парк Пелистер изобилува со уникатни природни богатства и претставува дом на ретки животински и растителни видови. За флората и фауната и за моликата, како синоним за Пелистер, прочитајте ја статијата.

Исто така, пелистерскиот масив е испресечен со поголем број на живописни планински реки низ кои течат бистри и ладни води. Сите тие ја сочинуваат нивната исконска дивина во декорот на планинскиот пејсаж. Тие се украс на планината и го облагородуваат пејсажот низ кого протечуваат.

Пелистер има развиена хидрографска мрежа која што изобилува со бистри изворски води, водопади и планински езера. На Пелистер посебна природна привлечност имаат двете глацијални езера т.н. „Пелистерски Очи“ или познати и како „Горски Очи“.

„Пелистерски Очи“ -Големото и Малото Езеро се леднички езера. Големото Езеро се наоѓа на надморска височина од 2.218 метри, долго е 233 метри, широко 162 метри, а длабоко 14.5 метри. Се протег во правец север-југ. Малото Езеро се наоѓа на надморска височина од 2.180 метри, долго е 79 метри, широко 162 метри, а длабоко 2.6 метри. Оддалечено е околу 2км од Големото Езеро, во северозападен правец. Се наоѓа во изворишната челенка на Црвена Река. Веднаш покрај Големото Езеро има и планинарски дом „Копанки“ со капацитет од 50-100 легла и прекрасни и пространи терени погодни за планинарење, алпинизам, планински велосипедизам и спортување. До езерата може да се стигне од две страни, по две одлично обележани планинарски патеки. Едната патека води од село Нижеполе од месноста Лак Поток (бараки) или ски-лифтот преку пределот Дебел Рид, а другата по која може да се движат и џипови и теренски возила започнува од хотелот „Молика“ и преку месноста Јоргов Камен, минувајќи го Малото Езеро завршува кај планинарскиот дом „Копанки“, до самото Големо Езеро. Во Големото Езеро живее малуброен ендемски вид на риби. Во летниот период во студените води на двете езера често се капат многу посетители и планинари.

За љубителите на планинарење тука е „патеката по камењарот“, која започнува од хотелот „Молика“, a завршува кај Големото Езеро, така што, целата должина на стазата изнесува околу 14 км. „Патеката по камењарот“ е едукативно показна стаза, која што посетителите на Националниот парк Пелистер ги води низ еден мошне атрактивен простор исполнет со разновидни природни убавини. Оваа патека како маркантна релјефна форма се состои од огромен број на камени блокови со различен облик и големина хаотично растурени и испревртени по целата должина на овој доминантен планински гребен на Пелистер( тоа се т.н. „камени мориња“кои претходно ги спомнавме).

Првата делница од „патеката на камењарот“, којашто води према планинарскиот дом „Копанки“ е стрмна и потешка за совладување, за потоа да продолжи низ рамен терен се до изворниот дел на Магарешка Река. Оттука, патеката повторно води низ стрмни предели се до месноста Горна Ливада, којашто претставува мала зарамнета тревеста површина опкружена со шума од молика. Од овде патеката постепено се искачува према врвот Пелистер (2601 м) минувајќи низ каменестите предели на возвишенијата Стив и Илинден. Од врвот Пелистер, патеката се протега низ тревни површини коишто претставуваат високопланински пасишта, при што, минувајќи покрај Малото Езеро завршува кај Големото Езеро на Пелистер, на надморска височина 2225 м, што е крајна точка на патеката. „Патеката по камењарот“ е означена е со патокази, има поставено информативни табли, а изграден е и еден видиковец и една настрешница. По неа ќе ве води водичката служба на Националниот Парк Пелистер.

Со цел да се заштити Националниот Парк Пелистер како природна реткост во Македонија и за да можат овие, но и идните генерации на посетители да уживаат во неговите убавини овде постојат неколку правила и прописи. Еве неколку од нив:
- Забрането е палење на оган
-Забрането фрлање на смет
-Забрането употреба на скара
-Забрането водење на миленичина
-Забранет лов и риболов
-Забрането кампување и ноќевање на отворено и под шатори.

Секоја повреда на овие павила, согласно член 183-а од „Закон за заштита на природата“ , се санкционира со прекршочни санкции, односно со глоби во износ од 50—70 евра во денарска противвредност.

Националниот парк Пелистер е отворен 24 часа, седум дена неделно,освен при непогодни временски услови. Паркот има свој Инфо Ценатар, кој работи секој ден од 9:00 – 15:00 часот, а има постојана изложбена поставка, сала за семинари и работилници, библиотека и сувенирница.

Повеќе за Националниот парк Пелистер и за неговите убавини можете да прочитате овде.

Затоа, за да ги видите и доживеете сите убавини на планината Баба и Пелистер, дојдете во Национален парк Пелистер! Велат, кој еднаш бил на Пелистер, сигурно ке дојде пак!

Тиквешкото Езеро се наоѓа на неколку километри од Кавадарци. Најголемо вештачко езеро во Македонија со 28.5km, а просечната широчина е 500m.

Температурата на Тиквешкото езеро е 24 степени Целзиусови што го прави погодно во летниот период за различни видови на спортови,и за капење.

Но, тоа не е единственото нешто кое може да го правите во овој крај. Тиквешкото езеро изобилува со флора и фауна, со најразлични видови на слатководни риби и птици. Најзастапени риби се: крап, сом, клен, костреш па затоа е честа дестинација на љубителите на риболовот.

За европската јавност примамливи се и крупните грабливи птици кои вооедно спаѓаат во светски и европски реткости.

На крабрежјето на Тиквешкото езеро се наоѓаат повеќе од 1.500 викенд куќи, а специфичнии и посебно атрактивни се оние до кои се патува со чамче.

Па ако се размислувате да поминете викенд на Тиквешкото езеро, наполнете ги торбите со храна и воопшто не се двоумите, затоа што има многу што да се види и прави.