ТУРНЕЈА НА МАКЕДОНСКИОТ ПОЕТ НИЗ САД

На тој начин таа беше достапна до стотици илјади читатели во сите американски држави. Песната е преземена од книгата на Маџиров „Остаток од друг век“, која беше објавена во САД од реномираната издавачка куќа „БОА едишнс“ пред околу два месеци и која за краток период доживеа одлични реакции од читателите и од критиката.

Американскиот поет Роберт Пик пишува: „Песните на Маџиров ми го одземаат здивот - сензитивни, умни опсервации, секогаш со длабока потсвесност за егзистенцијалниот копнеж“. Маџиров ја претстави книгата во повеќе од десет универзитети низ САД, почнувајќи од универзитетот „Џорџтаун“ во Вашингтон, преку универзитетот „Њујорк“, универзитетот „Северен Тексас“ и универзитетот во Сан Диего. Во Њујорк, тој читаше заедно со поетесата и соработничка на Ален Гинзберг и Боб Дилан, Ен Валдман, а во другите градови со значајните имиња на американската современа поезија Чејз Твичел, Валжина Морт, Илја Камински и др. Најголемото читање се случи на универзитетот „Џонс Хопкинс“, на меморијалното поетско читање „Џошуа Рингл“ во Музејот на современа уметност во Балтимор, кое се одржува еднаш годишно. Маџиров во преполната сала читаше со една од најзначајните живи американски поетеси Каролин Форше.

Тој е прв странски поет во четиринаесетгодишната историја на овој поетски настан што влезе во кругот на Рингл-поети како Џон Ешбери, Били Колинс, Роберт Пински, Шерон Олдс и други американски автори.

Есенва, неговата поетска книга на германски јазик ќе се објави во една од најзначајните германски издавачки куќи „Ханзер Ферлаг“, како најмлад автор во поетската едиција „Лирик кабинет“ заедно со нобеловецот Дерек Волкот, кинескиот поет Беи Дао, Швеѓанецот Ларс Густафсон, како и американските поети Џон Ешбери и Чарлс Симик.