МОТО ГП - ГОЛЕМА НАГРАДА НА ГЕРМАНИЈА

Докторот се враќа на патеката Захзеринг

Ми недостасуваше натпреварувањето, особено мојот мотор и тимот. Се чувствувам многу добро, операцијата мина добро, докторите направија добра работа, а јас секој ден напорно работев за што побрзо да се вратам во форма. Меѓутоа, големо е прашањето дали сега ќе успеам да издржам цела трка, изјави Роси

Медицинскиот тим на трката во Захсеринг (Германија) му даде зелено светло на актуелниот шампион во Мото ГП, Италијанецот Валентино Роси за настап на неделната трка што ќе се вози за Големата награда на Германија.

Роси претрпе двојна скршеница на потколеницата на почетокот од јуни на трката во Муџело (Италија), а многумина предвидуваа дека ќе му бидат потребни барем три месеци за опоравување од повредата, но тој ги демантира сите прогнози .
-Докторот уште минатата недела се врати на патеките и во рамките на подготовките за неделната трка го тестираше моторот на Јамаха за Светскиот Супербајк шампионат на патеката Мизано, а возеше и на почетокот од неделата во Брно.

Во Захзеринг Роси беше прегледан од главниот доктор на трката Хубер Фишер кој ја поддржа одлуката на медицинскиот тим на деветкратниот шампион во Мото ГП.
-Ми недостасуваше натпреварувањето, особено мојот мотор и тимот. Се чувствувам многу добро, операцијата мина добро, докторите направија добра работа, а јас секој ден напорно работев за што побрзо да се вратам во форма. Меѓутоа, големо е прашањето дали сега ќе успеам да издржам цела трка, изјави Роси.

Враќањето на Италијанецот во тимот го поддржа и неговиот тимски колега Шпанецот Хорхе Лоренцо.
-Валентино е возач со најмногу титули, единствен кој во ова натпреварување прави шоу и сите се среќни заради неговото враќање, изјави Лоренцо, кој утре во Германија ќе ја брка шестата победа сезонава со која дополнително ќе ја зголеми предноста во генералниот поредок.

Педроза пак најбрз, во Јамаха оптимисти

Дани Педроза беше најбрз, а доминацијата на Хонда продолжи и на првиот ден на последниот Мото ГП тест пред стартот на сезоната во Катар. Сесијата под рефлектори повторно донесе 1-2-3 пласман на возачите на Хонда, со Педроза пред Кејси Стонер, и Хироши Аојама од сателитскиот Гресини Хонда тим.

Педроза го постави своето време од 1:56.271 на два часа пред крајот на сесијата, подобрувајќи го претходното најдобро време на Стонер за 0.143 секунди, додека Аојама беше само уште 0.03 секунди зад Стонер. Топ 6 го комплетираа три Јамахи - фабричките возачи Бен Спис и Хорхе Лоренцо, и ветеранот од Тех 3, Колин Едвардс. Андреа Довициозо следуваше во третата фабричка Хонда.

Дукати повторно имаа тешка вечер. Валентино Роси падна рано на 9-тата кривина, и иако се врати на мотоциклот, заврши на 8. место, пред колегата Ники Хајден. Ранди де Пуние падна двапати за да бие 10. за Прамак Дукати, додека ѕвездата од тестирањето во Сепанг, Марко Симончели беше 11. во Гресини Хонда.

И покрај доминацијата на Хонда, од Јамаха изјавија дека се оптимисти дека ја намалиле разликата и дека влегуваат подготвени во новата сезона.

"Развојот се движи во вистинска насока и се надеваме дека ќе поминеме уште многу километри. Поблиску сме до врвот и тоа е позитивно", вели Спис.

Светскиот шампион Лоренцо по острите критики по тестирањето во Сепанг, беше посмирен.

"Се обидовме со поинакви работи, и поблиску сме до момците од Хонда отколку во Сепанг, така што сум задоволен", изјави Лоренцо.

РАДОСНА ВЕСТ ЗА ЉУБИТЕЛИТЕ НА МОТО СПОРТОТ

 

Барањето за увоз на мотоцикли од САД е усвоено!

Барањето беше доставено до министерството за економија откако беше организирано возење за поддршка на барањата на мотоциклистите на кое поддршка дадоа сите мото клубови од земјава. Заедно со барањето до надлежното министерство беа доставени и повеќе од 1000 потписи на петицијата, потписи кои беа собрани за само неколку дена.

На 30 декември во 11.20 часот претставници на мото-заедницата во Македонија ќе имаат предновогодишна средба со министерот за економија Ваљон Сараќини по повод позитивниот одговор на нивното барање за најновите измени во Правилникот за единечно одобрување на возило, со кои се овозможува увоз на употребувани возила од категоријата Л (моторцикли) произведени за или во САД.

Процедурата за преостанатите барања (намалување на цената на зелениот картон и дозвола за регистрација на мотори на период помал од една година) сеуште се во тек, а се надеваме дека надлежните министерства и Владата на РМ ќе одговорат позитивно и за нив.

Ја користиме оваа прилика да им се заблагодариме на сите кои се потпишаа на петицијата, сите кои учествуваа на возењето и покрај тоа што времето беше катастрофално и на сите оние кои ни дадоа поддршка.