ВЕРСКИ ВЕСТИ

   Г. Стефан верувал во измамник

Македонски иселеник од Австралија го убедил поглаварот на МПЦ, г.г. Стефан, да стави потпис на договор тежок 83 милиони евра за изнајмување на хотелите „Изгрев“ и „Бисер“, иако немал пари

Поглаварот на МПЦ, архиепископот Стефан, бил измамен од еден македонски иселеник од Австралија со кого склучил договор за привремено отстапување на црковните хотели „Изгрев“ и „Бисер“. Договорот бил за вредност од 83 милиони евра, иако нашиот сонародник немал толкави средства, дознава „Дневник“. 

Наместо нашиот сонародник да почне да ги инвестира ветените пари, тој од март минатата година, кога заедно со архиепископот Стефан потпишале „Договор за заедничка соработка“, воопшто не се појавил во канцеларијата на поглаварот на МПЦ ниту, пак, дал објаснување што планира да прави. Од извори во македонската заедница во Австралија дознаваме дека нашиот сонародник веќе неколку месеци е во затвор поради криминалот и дека тој никогаш немал толку пари за да може да инвестира 83 милиони евра во обнова, реконструкција и доградби на хотелите „Изгрев“ и „Бисер“. Напротив, овој несуден деловен партнер на архиепископот на МПЦ бил учесник и во некои инциденти и се занимавал со сомнителни бизниси.

„Дневник“ деновиве дојде до копии на договорот што архиепископот го потпишал со нашиот сонародник, струмичанец по потекло, кој живее во Мелбурн, а е потпишан на 24 март 2004 година. Дека таков документ постои, во минатиот петок потврдија и во Кабинетот на поглаварот на МПЦ.

- Станува збор за преддоговор што вообичаено се склучува меѓу двете страни што имаат намера да соработуваат. Но, откако беше потпишан документот, тоа лице не се појави повторно за да видиме до каде е соработката. Така, оттогаш, нема ништо од деловен однос. Ние сакаме да најдеме некој што ќе инвестира во хотелите - изјавија претставниците на Кабинетот на архиепископот.

Во МПЦ не објаснуваат на кој начин нашиот иселеник, кој е и австралиски државјанин, дошол во контакт со поглаварот на МПЦ и врз основа на што толку брзо бил склучен Договорот за заедничка деловна соработка. До ова дојде откако МПЦ успеа за 1,5 милион евра сопствени пари да го купи руинираниот хотел „Изгрев“ во Калишта крај Струга, по аферата за која неодамна првостепено беа осудени струшките браќа Димитар и Ѓорѓи Миладинов. Како што е познато, тие добија повеќегодишни затворски казни поради злоупотре*и при добивањето на банкарски кредити за овој хотел. Миладинови беа деловни партнери на МПЦ во заедничката фирма, а во текот на полициската истрага не се откри вмешаноста на црковните достоинственици.

Инаку, договорот предвидува нашиот сонародник од Австралија да има право да стопанисува 40 години со хотелите „Изгрев“, во сопственост на МПЦ, како и со хотелот „Бисер“ на кој Црквата, со Одлука на Владата на РМ, има право на трајно користење. Правото на користење се однесува и на помошни манастирски и стопански објекти и градежно неизградено земјиште. Струмичанецот се обврзал, а архиепископот му поверувал, дека во тој период ќе го реновира хотелот „Изгрев“ со 22 милиона евра, „Бисер“ со 7,5 милиони, ќе изгради нов хотел вреден 32 милиона евра, ќе ги реновира помошните манастирски објекти за 3,5 милиони евра, дека ќе купи туристички брод за милион евра... Секоја година, во период од четири децении, МПЦ за закуп на двата хотела требало да добива вкупна годишна закупнина од 150.000 евра, а 20 отсто од чистата добивка на работењето на хотелот „Изгрев“ и 30 отсто од профитот на „Бисер“. Партнерот формирал и фирма во земјава, а седиштето и' било во хотелот „Бисер“.

Администраторот на Австралиско-новозеландската епархија, владиката Петар, изјави дека првпат слуша за таков договор.

- Не сум информиран ниту консултиран околу тоа од страна на поглаварот. Не го знам ни тој деловен партнер - одговори владиката Петар.

И синодскиот портпарол, владиката Тимотеј, кој е член на Архиепископскиот управен одбор, кој одлучува за вакви потфати, изјави дека архиепископот не им соопштил ништо околу плановите за водење бизнис со некој наш сонародник од Австралија.

Во македонската заедница во Австралија не го криеја разочарувањето од постапката на поглаварот.

- Тој и нас не не' консултираше околу тоа, ниту провери кој е човекот со кого склучува договори. Не можеме да поверуваме дека таквите договори можат да се склучат со секој што во неговиот Кабинет ќе се претстави како човек што има 83 милиони евра - велат во заедницата. (Р.Д.)

Внеси реплика	страница <1 62 636465 66 86 >
Tweet