Париз, местото каде што се среќаваат префинетоста, гламурот и раскошниот стил, уште еднаш покажа зошто важи за една од светските модни престолнини. 

Ориент глам – рок новото оружје на Жан Пол Готје

Можете ли да ги замислите ориенталните елементи и гламурозната страна на рокот во едно? Готје може! Неговата колекција е префинет спој на две сосема различни модни приказни што резултираше со необична игра на бои и форми.

Раскошните принцези на Вали

Фустаните со многу слоеви, нагласената половина и кратките модели од тул и свила ја направија оваа ревија една од најромантичните на париската недела на висока мода.

Геометрија со печатот на Армани

Предимензионираниот накит, елеганцијата низ чистата геометриска форма и акцентот на моќни бои, се само дел од обележјата на новата колекција на Армани.

Тантела и раскош од Ели Сааб

Уште една колекција која ја истакнува женственоста преку драматичните креации со многу детали и се разбира многу тантела. Препознатливиот Сааб повторно маѓепса со неутралните тонови оставајќи ја публиката со громогласен аплауз да го поздрави неговото ново дело.

Шанел на граница помеѓу реалноста и сонот

Модната ревија на Шанел донесе многу твид, перја и крзно. Во еден момент прикажува модерна романтика, а веќе во следниот флертува со лесна готика. Карл Лагерфелд создаде сè освен обична и здодевна колекција.

Диор остана верен на традицијата

Препознатливиот крој на Диор овој пат беше зачинет со тренди жолта, портокалова и црвена боја. Раф Симон претстави креации кои на прв поглед маѓепсуваат со својата едноставност и префинета женственост.