Болните од реума артрит се граѓани од втор ред?

Поради немање доволно пари, Клиниката за ревматологија е принудена да им ја прекинува терапијата на најтешко болните.
Надлежните никако да ја чујат маката на болните од ревма - дека треба да се лекуваат со биолошка терапија, која ќе спречи да станат инвалиди. Доведен е во прашање дури и третманот на оние педесетина болни кои лани имале „привилегија“ да бидат лекувани со современите лекови. Поради немање доволно средства, Клиниката за ревматологија е принудена на некои од најтешко болните пациенти да им ја прекинува терапијата и да ги лекува со застарена терапија која не им дејствува, а долга е листата и на нови болни кои чекаат со месеци за терапија. Здравствените власти веќе три месеци молчат за проблемот на болните со ревма, а Клиниката за ревматологија, како што дознаваме, и годинава нема да добие поголем буџет за лекување на овие пациенти. Не помогна дури ни повикот на словенечкиот стручњак за ревматологија дека е катастрофален третманот на македонските пациенти со ревма.
„И покрај тоа што еминентниот професор по ревматологија од Словенија, проф. др. Матија Томшиќ, алармира за загрижувачката состојба во лекувањето болни пред два и пол месеци, до денеска никој не не' повикал, иако се крои судбината на нашето здравје “, истакна претседателот на Здружението на болните со ревма (НОРА) Драган Чичиќ, кој вели дека не знае што треба уште да прават Министерството за здравство да почне да ја почитува сопствената стратегија дека треба да комуницира со пациентите за нивните проблеми. Пациентите велат дека уште еднаш ќе им подадат рака на надлежните за да го решат проблемот, а потоа не знаат во кој правец може да експлодира нивниот револт од ваквиот индиферентен однос на државата спрема нив.

Математиките на НОРА и на стручњаците и натаму се на страната на болните, зашто секое нелекување на ревмата со осовременета терапија ги води директно кон инвалидска количка. „Санирањето на последиците од нелекувањето на ревмата, скршениците и операциите на скршениците е неколкукратно поскапо од современата терапија“, додава Чичиќ.

По реакцијата на НОРА, Министерството за здравство, конечно, се огласи. Објаснувањето на Министерството е контрадикторно, зашто во соопштението се вели дека Клиниката за ревматологија ќе достави протоколи за лекување ревматоиден артритис до Фондот, по што ќе биде дефинирано колку ќе биде зголемен буџетот на клиниката. За веднаш потоа да речат дека иако преговорите меѓу Фондот и Клиниката за ревматологија за дефинирање на нивниот годишен буџет се во тек, Министерството за здравство има информации дека буџетот на Ревматологија ќе биде зголемен за околу 10 отсто за болничко лекување. Но, нема податок колку болни ќе може да се лекуваат со тие пари.

За Министерството за здравство и натаму приоритет се пациентите, па затоа веројатно и реакцијата на НОРА ја оквалификува како непринципиелна и обид за притисок и лобирање во полза на еден производител на лекови.

Од Клиниката за ревматологија, пак, кратко ни рекоа дека досега ги дале сите потребни фармакоекономски анализи со проектиран број болни со ревма и имале неколку средби со надлежните, но засега нема никакви конкретни резултати.