На претстојното 58-мо издание на најголемиот европски музички натпревар наречен песна на Евровизија, кој ќе се одржи во мај 2012 во Баку, Азербејџан, Македонија ќе ја претставува нашата поп-дива Калиопи. Така денес одлучи Македонската радио телевизија, која како полноправна членка на европската радиодифузна унија го има ексклузивното право на избор на македонскиот евровизиски претставник.

Раководството на МРТ, во договор со избраниот евровизиски тим и програмскиот колегиум на МТВ, одлучи оваа година да го промени досегашниот концепт на избор на песна и пејач кои ќе ја претставуваат Македонија на претстојното издание на Евровизија, кое ќе се оджи од 22-26 мај 2012 во новоизградената кристална палата во Баку, Азербејџан.

На ваквиот чекор-да се одвојат Скопскиот фестивал и Евросонг како посебни проекти, МРТ се одлучи по низа направени анализи, а со цел поголем успех на Мекедонија на најпрестижната музичка манифестација, како и подигнување на реномето на најголемиот музички фестивал кај на скопскиот, кој пак е веќе закажан за 13 –ти ноември 2012-та.

На покана на МРТ, ова се првите импресии на Калиопи: 

“ Ви благодарам многу на поканата, се разбира дека ја прифаќам, жал ми е што во највозбудливиот момент не сум во Македонија, почестена сум, одговорноста е огромна“.

Калиопи е најголемата македонска поп-ѕвезда и една од најголемите на балканот која зад себе има повеќе децениска успешна и плодна кариера како автор и интерпретатор на 9 соло албуми, преку 100 концерти ширум Македонија и надвор од неа, 3 големи концертни турнеи, голем број видео изданија на своите најголеми хитови, 3 документарни филмови, како и музика за филм, театар и современ балет. Воедно, Калиопи се истакнува и со својата соработка со други познати музички имиња од домашната, балканската, но и од светската музичка сцена, како и со своите хуманитарни активности.

По враќањето на Калиопи во Македонија ќе биде закажана и првата официјална средба со раководството на МРТ на која ќе бидат прецизирани сите детали врзани за проектот, како и првата средба со медиумите.