Бело Робје

 

Малолетнички спасени од Проституција

Горан НАУМОВСКИ

Две малолетнички, од Битола и од Гевгелија, биле принудувани на сексуален однос со гостите во гевгелиска кафеана, откако претходно им била ветена работа за солидна дневница во локалот. Газдата на кафеаната, неговата вонбрачна сопатничка и неговиот пријател ги терале девојчињата да водат љубов претежно со грчки државјани.
Малолетничките откако успеале да се спасат од синџирот на проституцијата побарале полициска заштита. Групата е уапсена. Неа ја сочинувале 32-годишен гевгеличанец, кој од гевгелиското обвинителство е обвинет за трговија со малолетно лице. Неговата невенчана животна сопатничка, 21-годишната струмичанка од селото Куклиш, е обвинета за соучесништво. Ист обвинителен акт заработи и неговиот пријател. Од вчера, со одлука на истражен судија макрото е во 15-дневен притвор.
Одисејата на девојчињата почнала зимава сосема случајно. Според полицијата, гевгеличанецот се изживувал и сексуално ги експлоатирал девојчињата, едната на 14, а другата на 17-годишна возраст.
Полицијата од помладата дознала дека таа се запознала со макрото на ромска забава за последната прослава на Стара нова година, каде што дошла во друштво со братучетка и. Роднината заминала од забавата, ја оставила сама со газдата и вечерта по телефон ја советувала да работи во неговиот кафе-бар. Малолетничката била принудена да остане, бидејќи немала пари да се врати во Битола.
Таа во угостителскиот објект „Паќет“ во Гевгелија работела како келнерка.
Честопати била принудувана да ги забавува гостите што доаѓале во кафеаната и да седи во нивно друштво. Кога ќе посакала да излезе ја придружувала струмичанката. Преку познаник успеала да избега од кафеаната, да стигне дома и да ја извести полицијата.
Втората малолетничка се запознала со макрото во февруари годинава, кога се пријавила на конк*рсот за келнерка. И таа била навредувана и принудувана да дава сексуални услуги за 50 евра. Дел од парите му ги давала на газдата. Посредник бил и друг гевгеличанец, кој ги наоѓал клиентите, го договарал времето и местото каде што малолетничката била принудувана на сексуален однос. Тоа најчесто се случувало во куќи, станови, автомобили, а МВР тврди дека неколку пати била носена и во хотелот „Ашиков“.