КОШАРКА - новости

ПРВОЛИГАШИТЕ НЕРАСПОЛОЖЕНИ ДА СЕ "ПРОШИРАТ"

(Не) возможна мисија...

Се поголемо е оддалечувањето од намерите на УО на КФМ и желбата на Здружението да се "шири" кон Велес и особено кон Прилеп.

Ниту получасовното образложение на претседателот на КФМ, воедно и на Управниот одбор, Даниел Димевски, кој важи за најголем иницијатор во следната сезона лигата да брои 12 место предвидените 10 клуба, не беше доволно за да ги разубеди прволигашите во обид да се донесе една вистинска одлука.

Одлука од која македонската кошарка би имала многу поголема корист отколку штета.

Мисијата во која тргнал првиот човек на КФМ, со која сака да ја "прошири" лигата за уште два центри, во овој случај Велес и Прилеп , не наиде баш на некој добар "прием" кај десетте клуба кои во моментов уживаат во статусот на прволигашки.

За нив е поразително, дури и потценувачки барањето на двата клуба, Овче Поле и Ултимејт Баскет, да бида упатено директно до УО на КФМ, а не на адресата на Здружението на прволигашите.

Целта, како што истакна Димевски, за една ваква идеја е интерес за подигнување на кошарката на едно ниво погоре. Да се направи уште еден чекор напред.

""Вајлд-картата е моја измислица преку која со несекојдневни мерки и средства, методи стигнавме до онаму каде што сме сега. Со два центри како Кавадарци и како Охрид, кои се и тоа како битни. И моја е вината за она што се случи со Маврово. Клуб кој и вие се обидовте максимално да го поддржите, или толерирате до последен момент. И пак ќе бидам за тоа затоа што во тој западен дел беа единствените кои ја имаат кошарката. Да, тоа беше неуспешна епизода, но тоа не значи дека не треба да продолжиме по истиот пат, да развиваме други центри"- се обиде да објасни Димевски.

Уште побитен момент според првиот човек на КФМ за една ваква идеја е што во кошарката би влегле два "некошаркарски " спонзори какви што досега беа "Витаминка", односно "Џумајлија", кои стојат зад двата апликанти.

"Едниот беше фудбалски, другиот многу повеќе загреан за ракометот, и затоа не смееме да го испуштиме овој момент"- дообјасни Димевски.

И иако првичното барање на Здружението беше доколку лигата се прошири на 12 клуба, двата клуба апликанти да уплатат по 30.000 евра, сега некако во втор план паднаа финансиските средства.

Димевски се обиде да појасни дека нема ниту недостиг на играчи во Македонија.

"Финансискиот аспект сигурно не е во прв план, а не е дека нема играчи, напротив, има, и тоа доста, што е сосема различно од некои претходни изјави. Мора да знаете дека ние како федерација немаме намера да наметнуваме решенија, туку дека сакаме да зборуваме со силата на аргументите. одлуката треба да биде заедничка, а не само да се сведува на тесноклупски интереси"- го затвори својот "елаборат" Димевски.

А клубовите не би биле тоа што се ако уште еднаш не го покажаа и своето второ лице.

Останаа во најмала рака недокажани. Иако потпишани, и тоа сите 10 на петицијата за "непроширување' на лигата, побараа нов собир, и тоа на 20 јуни (петок), во 11 часот, на кој очекуваа(т) да се појават и претставниците на двата клуба-апликанти.

Па откако ќе послушаат уште две "образложенија", можеби ќе се донесе и конечната одлука, Прва лига со 10 или со 12 клуба.

А дотогаш времето поминува, полека се ближи, истекнува, она од преодниот рок....како што забележа некој од присутните.

И затоа, како што го нарекоа гестот на добра волја, ќе се соберат уште еднаш, пред с$ да видат дали работите сме смениле на подобро или останале исти.



ПРЕТСЕДАТЕЛОТ НА СВИССЛИОН ПЕЛИСТЕР, МАРИО ТРИФУНОВСКИ, СО СВОЕ ВИДУВАЊЕ

Во Прилеп нема ништо...

"Уште не можеме да појасниме некои работи. На пример, како може екипа која играла во Трета лига, каде била третопласирана, да добие прволигашки статус. Ние во Свисслион Пелистер многу добро ја познаваме ситуацијата во Прилеп. И можам слободно да кажам дека таму нема ништо. Лани играа со четири играчи од Битола, од Пелистер, во првата петорка. Петтиот беше токму Влатко, кој сега сака да играат во Прва лига. Немаа ниту младински екипи, да не зборувам за школа, тренери. Едноставно кажано, вештачка работа. Таму има пари ама нема ништо.

И затоа би испаднале максимално несериозни доколку прифатиме една ваква ситуација"- се обиде да ја "отслика" реалноста во Прилеп, првиот човек на битолскиот прволигаш.

10.000 евра - потценување

Сосема потценувачки за прволигашите е "желбата" на двата клуба директно да му се обратат на УО на КФМ, а не токму на нив.

"Тоа се гледа и во барањето кое е насловено само до УО на КФМ" - забележаа претставниците на клубовите. "Со тоа тие н$ потцениле во старт. Факт е дека има грешка во чекори затоа што тие барања требало прво да одат до Здружението, па дури потоа да ги разгледува УО на КФМ".

Освен тоа, цифрата од 10.000 евра е потценувачка и за оние два клуба кои по регуларен пат се изборија за место во Првата лига.

"Ние потрошивме многу повеќе од таа сума. И со еден збор, тоа е потценување" - констатираше претставникот на Торус, првполасираната екипа во Првата "Б" лига.

КИНЕЗОТ ОД ХЈУСТОН РОКЕТС НЕ ЗНАЕ КОГА ЌЕ СЕ ВРАТИ Јао има "нејасна ситуација" Прогнозите дека левото стопало на Јао-Минг изгледа сосема добро, во пресрет на предолимпискиот турнир, не се многу оптимистички, вели агентот на високиот Кинез. Џон Хуизинга кажа дека с$ уште нема потврда информација дали неговиот клиент ќе игра на "Купот Борислав Станковиќ", кој важи како предолимписки а е закажан за периодот од 17 до 20 јули во кинескиот Хенгџу. "Работите одат на подобро. Ако е с$ исчистено, можеби тој ќе има шанса да игра, но сега е многу рано да се зборува за еден таков распоред"- изјавил Хуизинга. Дваесет и седумгодишниот прв центар на Хјустон Рокетс имаше фрактура на левото стопало, и од 27 февруари не одигра ниту еден натпревар за тимот од Хјустон. До тој период имаше дабл-дабл просек изразен преку 22 поени и 11 скока. Во меѓувреме Јао потврди дека нема да ја напушта својата родна земја с$ додека не биде целосно подготвен да се врати на тренинг во Хјустон. Но според последните клупски информации, можно е до крајот на овој месец Јао, сепак, да дојде до Хјустон и да оди на лекарска контрола кај тимскиот доктор на Рокетс. "Можеби, но навистина е многу рано за него да биде инволвиран во некои пребрзи работи"- констатира агентот на Минг, кој пред извесно време ја стартуваше "Јао-Минг фондацијата" преку која сака да им помогне на неколку кинески области погодени од катастрофалните земјотреси. ГАЗДАТА НА ЈУТА ЏЕЗ ИМА ЗДРАВСТВЕНИ ПРОБЛЕМИ Милер хоспитализиран!!! Сопственикот на Јута Џез, Лери Милер поради здравствени компликации во текот на вчерашниот ден е хоспитализиран. Според првичните информации станува збор за дијабетис. Засега како што велат од клубот и најблиските, 64-годишниот Милер е надвор од животна опасност и се очекува во најскоро време брзо да се опорави. Иако состојбата е добра, сепак с$ уште не се знае кога Милер, кој 23 години е сопственик на Јута Џез ќе биде пуштен на домашно лекување.

 

БОСТОН СЕЛТИКС ИМА ДВЕ МЕЧ ТОПКИ ЗА 17. ТИТУЛА, ПОЛ ПИРС УБЕДЕН ДЕКА ЌЕ ИСКОРИСТАТ БАРЕМ ЕДНА

Подобри сме, ќе земеме една

Селтикс се дома, но не се чувствуваат така удобно, особено не по последната игра од која можеа да извлечат голема победа.

Но, останаа со празни раце, па ја вратија серијата во својот град.

Сепак, Бостон има две топки за титула и тоа пред своите гледачи за да дојде до првата титула по далечната 1986 година и ерата на Лери Бирд, Кевин Мек Хејл и Роберт Периш.

Но, повредите уште еден голем дефицит во првото полувреме и топло-ладните претстави на Кевин Гарнет, "келтите" ги чинеа уште еден пораз и испуштена голема шанса за титулата да биде прославена уште во Холивуд.

"Не е тоа што го баравме. Ние сакавме уште две победи таму. Не го направивме тоа, се вративме дома, и реално е да се верува дека можеме да земеме една од овие две кои се пред нас" - вели Док Риверс.

Ќе има проблеми шефот на стручниот штаб на Бостон да ја формира екипата за титула. Пред натпреварот број 6 има проблеми со повредата на рамото на Кендрик Перкинс, нестабилноста на Рејџон Рондо предизвикана со повредата на скочниот зглоб на левата нога.

На тоа се надоврзаа и семејните проблеми за Реј Ален (болест на синот поради која мораше веднаш да го напушти ЛА).

Не смее да се заборави ниту фактот што Пол Пирс игра со повредено колено.

Традицијата е на страната на Селтикс, таа вели дека ниту една екипа во финалето не се вратила по 1-3. А шансите на Бостон се мерат во однос 1-17, за да ја освојат својата 17. титула.

"На една победа сме до титулата, а имаме два натпревари дома" - вели Пирс, кој даде рекордни во ова финале 38 поени на средбата број 5."С$ уште чувствуваме дека сме во предност, но и тоа дека сме подобар тим од нив".

Дали ова ќе бидат последните 48 минути од обновеното ривалство меѓу двата најголеми тима во историјата на НБА, ќе зависи и од многу други фактори.

Но факт е дека меч-топката е во рацете на тимот од Масачусетс.

ДОК РИВЕРС СВЕСЕН ЗА ДОПОЛНИТЕЛНИТЕ ТЕШКОТИИ КОИ ГИ НОСИ ФИНАЛЕТО

Преселбата ја уништува играта

Следејќи ги настаните од финалето, неминовен впечаток е дека форматот 2-3-2 можеби и не е среќно решение кога се играат вакви одлучувачки натпревари, особено кога еден против друг се Бостон Селтикс и ЛА Лејкерс.

Токму преселбата од истоток на Запад по само два натпревари им направи големи проблеми и на двете екипи. Фактор на кој не може никој да влијае како што треба и може.

Согласен со тоа е и Док Риверс. Тренерот на Бостон смета дека тоа делува уништувачки и дека не очекува којзнае каков квалитет во натпреварот број 6.

"Тоа се неверојатни турбуленции. Тешко е да се издржи, и тоа за секого во екипата. Мислам дека одењето од Запад кон Исток е уште потешко од она првото. Спиеш додека патуваш, а тоа не е добро, без оглед на тоа што и двете екипи се ставени во една иста позиција кога се зборува за тоа. Треба да влезеш во мечот максимално подготвен, а овие работи не го даваат тоа"- вели тренерот на Селтикс.

Сепак, Бостон ја има комфорноста во оваа серија, барем досега. А оние 12-1 во доигрувањето кои ги имаат на домашен терен треба да се гаранција дека титулата е многу блиску. Тоа и оние 16 банери кои се сведоци на 16 титули колку што досега собраа "келтите" се мотив кој треба да го совлада уморот при оваа последна преселба од Западот кон истокот.

"Тоа и не е така лошо место за да се биде таму" - констатира Риверс, мислејќи при тоа на ставањето и на 17. шампионски банер на врвот на "Банкнорт Гарден" во Бостон.

ЈУНИОРКИТЕ ПОЧНАА СО ПОДГОТОВКИТЕ ЗА ЕП "Б" ДИВИЗИЈА ЧИЈ ДОМАЌИН ЌЕ БИДЕ СКОПЈЕ

Почетна база, "Јане Сандански"

Од вчера и официјално нашата јуниорска женска селекција почна со подготовките за ЕП "Б" Дивизија кое од 6 до 15 август ќе се одржи во Скопје.

Селекторот на "црвено-жолтите", Светислав Костовски, на располагање има 15 кошаркарки, поголем дел од нив н$ претставуваа на Балканијадата во Романија која се одржа минатата година. А

добра вест за Костовски е тоа што во составот ќе биде и Јелена Антиќ, која во моментов се наоѓа во Скопје.

"Планот е овој месец да бидеме во Скопје, поточно во салата 'Јане Сандански' каде ќе тренираме двапати на ден. За разлика од минатата година сега нема да имаме селективни тренинзи, списокот е речиси оној истиот со кој заминавме на Балканијадата во Романија. Се радувам што во составот ќе биде Јелена Антиќ бидејќи нејзиното искуство ќе ни биде од голема помош" - вели селекторот на младинките, Светислав Костовски.

Инаку, репрезентацијата под "18" години на почетокот на идниот месец ќе одигра турнир на кој домаќин ќе бидеме токму ние. Практично овој турнир засега е единствената контрола за нашите младинки.

"На почетокот на јули планираме да заминеме во Виница каде би требало да останеме десетина дена. По завршувањето на подготовките ќе организираме турнир на кој ќе учествуваат Турција, Хрватска, Србија и Бугарија. Бидејќи засега ова се единствените контролни средби ќе се обидеме максимално да ги искористиме за што подобро да се подготвиме за ЕП" - додава искусниот стратег, кој заедно со своите избранички ќе имаат доста тешка задача, да ја одбранат честа како домаќини.

За потсетување Македонија е во групата "А" на Евробаскетот заедно со Австрија, Швајцарија, Германија, Луксембуг и Грција.

НА ДЕНЕШНАТА СЕДНИЦА (13 ЧАСОТ) ПРВОЛИГАШИТЕ ЌЕ ГО БРАНАТ СВОЈОТ СТАВ

Лигата може да ја "шири" само Управниот одбор

Здружението ќе инсистира, доколку УО на КФМ веќе инсистира, двете нови екипи во Првата лига да платат по 30.000 евра за "влез".

Нема напредок во "преговорите" на релација Здружение на Прва лига- КФМ. Едните сакаат, другите се чини немаат намера да го променат цврстиот став, да нема нови промени на прволигашката мапа, односно проширување на Првата лига за уште две заинтересирани екипи - клубови.

И на ден пред одржувањето на итната седница на Здружението нема промени на ставовите на поголем број од прволигашките екипи, лигата да брои 10 екипи.

"Нашиот став е јасен, Првата лига во наредната натпреварувачка сезона генерално да брои 10 екипи, пред с$ од аспект на задржување на квалитетот на лигата и натпреварите"- велат поголем дел од претставниците на клубовите кои ја потпишаа своевидната петиција за задржување на овој статус на лигата.

Свесни се во Здружението дека пред себе го имаат ставот на УО на КФМ, кој вели дека треба да им се дозволи влез на двата апликанти, во овој случај екипите на Овче Поле и на Ултимејт Баскет од Прилеп.

Затоа и излегоа со свое размислување за актуелната ситуација.

"Ако веќе УО на КФМ реши да прошири лигата, и тоа од 10 на 12 екипи, во тој случај ние како Здружение имаме право на една ваква реакција. Па ние веќе дадовме една дозвола, токму на седницата во Кавадарци кога дозволивме лигата од осум да брои десет екипи во натпреварувачката сезона 2008/2009 година. И сметаме дека тоа е веќе голема отстапка.

Друга работа, како на тоа ќе реагираат клубовите кои по регуларен пат дојдоа до својот прволигашки статус? Сигурно е дека и Торус и Поп Спорт како нови членои на Првата лига потрошиле многу повеќе од оние 10.000 евра кои сега стануваат 'гаранција' за влез во Првата лига. Лошо е ако сето ова стане практика, а сето ова води кон тоа" - дополнуваат од Здружението на прволигашите.

Како и да е, денешната седница на Здружението, закажана за 13 часот (во просториите на КФМ) би требало да даде каква-така завршница на оваа нималку очекувана ситуација.

Секој со свои предлози, идеи, желби. Затоа ќе биде тешко да се дојде до некој концензус на кој инсистираше претставникот-апликантот од Прилеп.

Дали "слогата" ќе ги сочува клубовите или, пак, ќе преовладее мислењето кошарката да се шири и во други градови во Македонија, останува отворено прашање, можеби и се надеваме дека ќе биде затворено уште денеска.

Б. Радуловиќ

Денеска, "дедлајн" за котизацијата

Согласно со претходно договореното, денешниот ден е означен како последен кога клубовите членови на Здружението на Првата лига треба да ја уплатат првата рата од задолжителната Котизација за следната натпреварувачка сезона.

Според пресметките на канцеларијата на Првата лига, доколку лигата остане на 10 екипи, секоја од нив ќе треба да уплати по 262.730 денари.

Доколку, пак, дојде до проширување, таа сума би била поголема, поточно би изнесувала 284.440 денари.

ЦЕНТАРСКИОТ ТАНДЕМ НА ЛЕЈКЕРСИ РАБОТЕШЕ ОДЛИЧНО

Гасол и Одом ја завршија работата

Ламар Одом и Пау Гасол се чини дека ги оставија зад себе разочарувачките игри во оваа финална серија против Бостон Селтикс.

Му помогнаа на Коби Брајант онака како што тоа треба да го прават на секој натпревар.

"Големите" на Лејкерси го надополнија слабото офанзивно издание на Коби особено во второто полувреме, собраа 39. поени и уште 24. скока, како и 6. асистенции.

"Се видов себеси и знам како одиграв на последниот натпревар. Знам дека не бев доволно добар во последната четвртина. Затоа сакав само да останам фокусиран и да играм до крајот на натпреварот"- кажа Одом по вториот триумф во серијата.

Тој го имаше можеби и пресудното додавање (до Брајант) во финалната минута од играта по кое на 37.4 секунди пред крајот, Лејкерси покачија на плус 4 (99-95).

Веќе во следниот напад на Бостон, ја собра одбиената топка по нереализираниот удар на Кевин Гарнет.

"Дефинитивно Ламар заврши голема работа вечерва. Добивме доста нови нешта од него, делувавме доста заеднички и тоа се покажа на крајот" - фалеше и Брајант

Гасол имаше 10. поени и 6. скока во второто полувреме.

"Мораше да дадеме се од себе да го направиме последниот напор и да го покачиме интензитетот на агресивност вечерва за да се вратиме од она што ни се случи пред неколку дена. Мислам дека и дефинитивно оваа победа ни помогна да ја набилдаме нашата самодоверба, да ја вратиме назад"- дополни шпанскиот интернационалец."Игравме добро. Можеби не најдобро како што знаеме, но игравме со сето свое срце".

Впрочем трите скока повеќе на салдото на Лејкерси во овојнатпревар (40-37), доволно говорат за играта на високите момчиња на Фил Џексон.

"И двајцата завршија голема работа посебно околу скоковите. Пау беше агресивен, имаше неколку добри игри под кошот, Ламар беше полн со енергија, тоа го покажаа токму вечерва"- се надоврза и Фил Џексон за играта на својот тандем, кој патем кажано имаше и одлична реализација, Одом 8 од 10 од оле, додека Гасол погоди 6 од 10 шута во рекетот.

Сега Лејкерси ќе мора да ги добијат и следните две средби од финалето за да бидат шампиони. Но Бостон има 12-1 во доигрувањето за титулата пред своите гледачи.

"Ќе биде супер тешко за да дојдеме до тоа"- смета Гасол. " Сакаме да дадеме се од себе за да дојдеме до тој седми натпревар. Ќе видиме колку ќе бидеме способни за игра во 48. минути во Бостон. Секако нема да биде лесно. Но ние сме полни со самодоверба и треба да го направиме тоа"- вели на крајот Гасол.

Ниту еден од вкупно 28. тимови во НБА не станале шампиони откако губеле со 1-3 во финалето на плеј-офот.

ЗА МАЛКУ УШТЕ ЕДЕН "КАМ-БЕК" НА СЕЛТИКС ВО "СТЕЈПЛС ЦЕНТАРОТ" ВО ЛОС АНЏЕЛЕС

Лејкерси се "живи", серијата назад во Бостон

А Лејкерс - Бостон Селтикс 103:98 (2-3)

(39-22; 16-30; 24-18; 24-18)

ЛА ЛЕЈКЕРС: Брајант 25 (7ск,4ас), Одом 20 (11ск,2ас), Гасол 19 (13ск,6ас), Фишер 15 (2ск,2ас), Фармар 11 (1ск,1ас), Радмановиќ 7 (5ск,2ас), Вујачиќ 4 (1ск), Волтон 2 (2ас), Мим, Туриаф, Ариза, Њубл;

БОСТОН СЕЛТИКС: Пирс 38 (6ск,8ас), Р. Ален 16 (2ск,2ас), Гарнет 13 (14ск), Кесел 9 (1ск,2ас), Хаус 6 (1ск,2ас), Т. Ален 6 (1ас), П.Џ. Браун 4 (3ск), Поуси 3 (6ск,2ас), Рондо 3 (2ск,3ас), Поу, Дејвис, Скалабрини;

Шампањското во чест на Бостон Селтикс не беше отворено во Стејплс Центарот. Дружината од Лос Анѓелес не им го дозволи, не им го даде тоа задоволство на "келтите" бидејќи во натпреварот број 5 Лејкерс победија со 103:98 и намалија на 3-2 во серијата која сега ја преселија во Бостон.

Сега Селтикс ќе мора да ја довршат работата во својот Банкнорт Гарден во Бостон.

Лејкерси не блескаа, но со еден тимски напор во кој Коби Брајант доби максимална поддршка, овој пат од неколку играчи, стигнаа до целта, серијата да ја продолжат, со тоа и надежта дека можат до невозможното.

Коби не одигра спектакуларно, освен ако не се земат предвид оние 12 минути од првата четвртина во кои постигна 15 од крајните 25 поени.

"Не можевме и не смеевме да допуштиме во нашата сала да се отвори победничкото шампањско за противниците"- рече Ламар Одом, секако еден од најдобрите играчи во составот на Фил Џексон на овој дуел. " Не беше лесно, но не ни очекувавме да биде така"- дополни еден од клучните играчи за победата број 2 на ЛА Лејкерс.

Оваа ситуација неодоливо наликуваше на онаа претходната кога "езеџиите" сами себе се "потопија".

Овој пат имаа плус 19 уште во првата фаза од играта, но дозволија Бостон целосно да се врати во мечот. На крајот ниту извонредниот Пол Пирс, кој постигна рекордни во ова финале 38 поени, не можеше да ја заврши серијата, па сега ќе мора да го стори тоа пред своите навивачи во Бостон.

"Сакавме да се вратиме дома како шампиони, но сега уште мораме да играме за таа титула"- изјави тренерот на Селтикс, Док Риверс. "Целата сезона напорно работевме да го заработиме тоа право да ги играме последните два натпревари на својот паркет. Бидејќи ни треба само уште една победа до титулата, не е нималку лошо што ќе имаме две шанси да ја зграбиме токму дома"- дополнува Риверс.

Коби Брајант беше доста "мирен", особено во моментите во кои досега не беше таков. Беше најефикасен, освен тоа имаше и седум скокови, четири асистенции и пет украдени топки, но и проблеми со "личните" како и шест загубени топки.

Но и еден "таков" Коби беше важен во моментите кога "се кршеше" натпреварот. Кога одигра неколку добри одбрани врз Пирс, и тоа во миговите кога гостите стигнаа до изедначување и шанса да "свртат" целосно.

И "клупата" на Лејкерси, толку оспорувана во однос на противничката, беше на нивото на задачата.

Сепак, најголемите заслуги одат кај центарскиот тандем Гасол-Одом, и двајцата со дабл-дабл ефект. Одом со 20 поени и 11 скокови, додека, пак, Шпанецот на 19 поени придодаде и изворедни 13 скока, со кои во целост делуваше рамноправно, дури и подобро во дуелите со Кевин Гарнет.

И КГ дојде до двоен ефект, но помал од Гасол (13 поени и 14 скока), но и три нереализирани слободни фрлања во финишот кој можеше да заврши и подобро и за него и за Селтикс.

А една од причините за крајниот резултат е и во тоа што освен нив само уште третиот член на "големото трио", Реј Ален, беше "двоцифрен".

Поточно првиот шутер на Бостон заврши со 16 поени и по два скока и исто толку асистенции.

Брајант почна фантастично, со четири тројки во првите осум минути за водство од 25-15 за Лејкерс, кое по поените на Радмановиќ беше покачено на 29-15 , за првиот период заврши со извонредни 39-22 за домашната екипа и дури 15 поени на контото на Коби.

А кога Вујачиќ погоди уште еднаш за 41-22, мислите веќе беа кон источниот брег и следниот дуел на великаните.

Но, "келтите" не мислеа на предавање, следуваше уште едно големо враќање на Бостон Селтикс и во овој меч.

По шесте празни минути на "езерџиите" Пирс го донесе гостинот на -4 (43:39), пред Одом да ја прекине таа црна серија.

Два разлика беше и на 1:14 минути пред крајот кога Пирс погоди за 95-97. А кога Фишер не погоди, токму Пирс се претвори во трагичар. Загуби една топка на водење, која Брајант ја стави со "забивање" за 99-95.

Но и тука, во Бостон не беше "мртво". Откако Коби беше делумен од линијата за слободни фрлања, на 14 секунди пред крајот беше само 101-98 откако Еди Хаус погоди од аголот "за три", а потоа беше блиску да им ја украде топката на Брајант и Фишер, кој беше фаулиран.

Искусниот бек не ја повтори истата грешка, ги реализираше двата "пенала", а потоа го искористи недоразбирањето на "келтите" и ја освои последната топка значајна победа број 2 во ова големо финале.