СКОПЈЕ 2014 или ЛУНА ПАРК '14

Стариот театар ќе има 46 скулптури на фасадата

Министерството за култура објави оглас за 24 скулптури од кои ќе се прават реплики за фасадата, и за 8 кои ќе бидат поставени во партерот

На фасадата на Стариот театар ќе има 46 скулптури од по два метра и 20 сантиметри, и 8 скулптури од по речиси два и пол метри на партерот. За нивното идејно решение неодамна беше објавен оглас. Како што ни рекоа од Министерството за култура, тие распишале оглас за идејно решение на 24 скулптури, што е во согласност со барањата на проектот.
"Од овие 24 скулптури, 16 ќе се изработат за фасадата, кои понатаму ќе се реплицираат до најмногу 46 скулптури, и истите ќе бидат поставени на фасадата на објектот Стар театар. Ваквата одлука Министерството за култура ја донесе, пред сè, од економични причини, бидејќи истите понатаму треба да бидат изработени од траен лесен материјал, но не мермер и бронза", објаснуваат од Министерството.
Се планира да има 8 скулптури поставени во партерот. Тие, според проектот, ќе бидат изработени од мермер и поставени по две скулптури на сите четири страни на партерот.
Што се однесува до мотивот, скулптурите треба да се вклопуваат во естетската целина со зададениот архитектонски простор. Од авторите се бара фигуративните содржини да претставуваат човечки фигури (машки и женски), реалистично изведени, кои ќе ја доловуваат атмосферата на драмата, комедијата и трагедијата, човечки претстави кои со нивната појава ќе упатуваат на содржините на театарот, литературата, музиката и на уметноста воопшто.
Камен-темелникот на Стариот театар беше поставен во 2007 година, а предвидено е целосно да биде завршен на крајот од 2011 година. Се планира овој објект да биде репрезентативно место за уметноста каде што ќе се реализираат голем број настани од повеќе дејности од културата.