Светот денес

Турскиот премиер Реџеп Таип Ердоган денеска изјави дека потпишувањето на Меѓувладиниот договор за соработка во областа на испораката на природен гас преку гасоводот „Набуко“ претставува историски момент за енергетската безбедност во Европа.

Тој на отворањето на свеченоста по повод потпишувањето на договорот нагласи дека проектот „Набуко“ е важен за пријателството и мирот.

„Проектот „Набуко“ покажува дека Турција треба да стане членка на ЕУ поради снабдувањето со енергетски ресурси“, истакна турскиот премиер.

Истовремено, Ердоган нагласи дека Турција би сакала ирански гас да се испорачува преку гасоводот, изразувајќи надеж дека со тек на времето преку него ќе се транспортира и руски гас.

Договорот е потпишан меѓу претставници на Бугарија, Романија, Австрија, Унгарија и Турција.

Специјалниот пратеник на САД за енергетските прашања во Евроазија, Ричард Морнингстар, претседателот на Европската комисија Жозе Мануел Баросо и еврокомесарот за енергетика Андрис Пиебалгс, исто така, присуствуваа на чинот на потпишувањето.

„САД не се противат Русија да се вклучат во проектот Набуко, но Иран не треба да учествува во него се додека не ги подобри односите со Западот“, истакна Морнингстар, додавајќи дека САД се обидуваат да ја ангажираат Русија во енергетските прашања.

Русија, според него, во проектот може да учествува или како клиент или како снабдувач на гас.

Проектот „Набуко“ предвидува да се изгради гасовод за пренос на природен гас од Централна Азија кон ЕУ, преку Турција и Југоисточна Европа. Обемот на транспортираниот гас се предвидува да изнесува 31 милијарда кубни метри годишно.

„Тајмс“: Гасоводот Набуко“ го елиминира монополот на „Гаспром“

Новиот европски гасовод „Набуко“ го елиминира монополот на рускиот „Гаспром“ во снабдувањето на Европа со гас, пишува „Тајмс“, поздравувајќи го потпишувањето на договорот за неговата изградба меѓу Турција, преку чија територија ќе минува и ЕУ.

Гасоводот како што јави дописникот на МИА од Лондон, се смета дека е еден од најамбициозните проекти на Европската Унија. Преку него од наоѓалиштата во Азербејџан, во Каспиското море и на Блискиот Исток до европските корисници ќе се префрлаат 31 милијарда кубни метри. Гасоводот ќе минува низ Бугарија, Романија, Унгарија и Австрија.

Сега Русија обезбедува околу 35 отсто од европските потреби, па лондонскиот весник смета дека најважното во овој проект е што „Набуко“ ги заобиколува руската и украинската територија. Тоа значи дека нема повеќе да се случува, среде зима, како што тоа беше годинава, Русија да го затвори протокот на својот гас за луѓето во Европа, затоа што е во кавга со Украина, забележува овој весник.

Според „Тајмс“, политичарите и стратезите во Москва, како во времето на комунизмот, така и во услови на авторитативната власт на Владимир Путин, размислуваат на посебен свој начин, така што секоја погодност за руските соседи, се смета како непогода за Русија. Затоа на Европа и е тешко да воспостави поволен однос со Москва, кога станува збир за снабдувањето со енергетски суровини, па во такви услови изградбата на нафтовод кој ја заобиколува Русија, е толку многу атрактивен проект, заклучува лондонскиот весник.