СКОПЈЕ 2014 или ЛУНА ПАРК '14

Работите на Парламентот не се дел од проектот „Скопје 2014“, вели тој, бидејќи тие отпочнаа пред него. Одлуката за утврдување на потребата и постапката за изведување реконструкција, доградба и надградба, Собранието ја донесе на 30 ноември 2006 година.

Најголем проблем, според спикерот Вељаноски, ќе биде тоа што додека се изведуваат градежните работи нормално ќе се одвива и функционирањето на Парламентот. За таа цел работите ќе се изведуваат по фази и по вертикали, така што вработените од канцелариите што се наоѓаат во предвидениот дел привремено ќе бидат иселени од нив.  

Со доградбата, надградбата, адаптацијата и зајакнувањето на објектот на Парламентот се предвидува изведување на нови 3.900 метри квадратни и адаптирање на 840 метри квадратни.

Предвидената надградба ќе се изведе над петоаголниот габарит со површина од 2.140 метри квадратни и над Кристалната сала од 256 метри квадратни. Во овие вкупно 2.397 метри квадратни се предвидени 88 работни простории и шест сали за комисии од кои две се покриени со куполи со радиус од четири метри.

Непосредно до салата „Борис Трајковски“ во внатрешниот двор на објектот, предвидена е доградба од пет нивоа со вкупна површина од 939 метри квадратни. Предвидени се 31 работна просторија и една повеќенаменска сала од 575 метри квадратни надоврзана на последното ниво на доградбата, физички поставена на самостојна носива челична конструкција над Парламентарната сала и покриена со купола со висина од 9,80 метри и дијаметар од 34 метри.

Со адаптацијата во сутеренскиот дел се предвидува под салата „Борис Трајковски“ изведување на простор за активностите на Собранискиот канал со површина од 233 метри квадратни, девет простории, како и адаптирање на дел од подрумскиот простор од петоаголниот габарит во помошни простории со површина од 600 метри квадратни.

Проектот за зајакнување на петоаголниот габарит на објектот на Собранието го изработи Институтот за земјотресно инженерство и инжинерска сеизмологија - ИЗИИС.
МИА