Македонски јазик

Кај нас македонскиот е сигурен, а циганскиот е во изумирање. Загрозени јазици се и аромански, мегленски и гагауски

По еден светски јазик исчезнува секои две недели. Од околу 7.000 јазици на кои денеска се говори во светот дури половина ќе исчезнат до крајот на столетието. Од вкупно 6.000 светски јазици, 96 проценти се говорени од само 4 отсто од популацијата. Деведесет отсто од светските јазици не се присутни на интернет. Осумдесет отсто од африканските јазици немаат ортографија.

Ова се фрапантните податоци кои ги прикажува УНЕСКО на својот сајт за загрозени светски јазици. Македонскиот јазик не спаѓа во нив, но во Македонија, од седумте јазици што се зборуваат, четири се во изумирање: аромански, мегленски, цигански, гагауски. Според Црвената книга на загрозени јазици од УНЕСКО, ароманскиот се користи во неколку мали делови во Македонија, мегленскиот кај Мегленска Река на границата со Грција, а гагаускиот во југоисточна Македонија. Ромскиот е претставен во две варијанти - ромски и цигански, кој е во изумирање. Македонскиот, албанскиот и турскиот, се сигурни.

Проценето е дека повеќе од половина од светската популација комуницира на само 8 јазици: Англискиот и мандаринскиот кинески, хинду (заедно со урду), шпанскиот, рускиот, арапскиот и португалскиот. Најчести причини за исчезнување на јазиците се постепеното претопување во двојазичните култури или пак едноставно со смртта на последниот човек што го познава тој јазик. Пет региони во светот се изложени на најголем ризик од исчезнување на јазици: северна Австралија, дел од Јужна Америка, северозапад на Северна Америка, источен Сибир и источен САД.

Како к*риозитет се споменува и тоа што половина јазици во светот немаат пишан облик и затоа се лесно ранливи. Тоа се случува во Австралија, каде се загрозени речиси сите 231 домородски јазици, а слична судбина им се заканува и на повеќе од 113 јазици кои се говорат на подрачјето на Андите и Амазон, каде шпанскиот и португалскиот јазик го преземаат приматот. Доминацијата на англискиот, пак, загрозува 54 домородски јазици на северозападот од Северна Америка.