BREAKING NEWS......!!!

Србија од денеска е без руски гас, се користат последните резерви

Пред неколку дена кога српската влада ја продаде Нафтената индустрија на Србија на Руската федерација за многу малку пари и големи ветувања за инвестиции властите постојано повторуваа дека на земјата и обезбедиле енергетска сигурност.

Но не помина ни месец дена, а стварноста ги демантира. Србија од денеска е без руски гас, се користат последните резерви. Таму каде што е можно гасот се заменува со мазут, а девет градови чии топлани неможат да користат мазут ги чека многу ладна зима.

Инаку во овој момент најзагрозена е Војводина, затоа што таа е и најмногу гасифицирана. Сега во најголема опасност е Нови Сад, таму 25 илјади станови на околу 70 илјади жители најверојатно за околу еден час ќе останат без греење.

Директорот на „Србија гас“ Душан Бајатовиќ денеска наутро замина во Будимпешта да позајми или купи гас од Нафтената компанија „МОЛ“.

„За жал Србија гас мораше да го испразни гасот од цевките во Србија за да не дојде до хаварија во системот. Ние штетите ќе мораме да ги надокнадиме наредните денови. Но има и многу позитивни елементи во овој момент. Цела ЕУ се крена на нозе, сите сакаат да обезбедат испорака на гас без кој очигледно неможе да се греат граѓаните на ЕУ па така е и во Србија“, изјави претседателот на Србија Борис Тадиќ.

„Ние би можеле со сигурност да ги покриеме комплетните потреби за греење без употреба на други енергенси кога се во прашање резервите на мазут. Со едно разумно и штедливо однесување и повеќе од тоа“, изјави министерот за енергетика во српската влада Петар Шкудриќ.

Доколку Киев и Москва наскоро не се договорат ќе не чека енергетски колапс и многу ладна зима.

Стопирана испораката на гас за Македонија

Макфакс

Испораката на природен гас во Македонија е запрена, поради спорот на Москва и Киев за цената на енергенсот. Руската државна компанија „Гаспром" утрово во целост ја прекина доставата за Бугарија, Грција, Турција, Романија, Хрватска, а значително е намалена за Унгарија, Австрија, Босна и Херцеговина и Чешка.

Транзитот на рускиот природен гас за земјите на балканскиот регион и Турција е прекинат утрово во 4 и 30 часот, потврди „Макпетрол“ а.д., повикувајќи се на соопштение од операторот ГА-МА.

„Како последица на тоа, започна опаѓање на работниот притисокот во нашиот дел од гасоводот, и се очекува за 20 до 24 часа од прекинот да дојде до потполн престанок на испорака на природен гас за работа на потрошувачите во Република Македонија“, соопшти „Макпетрол“. За настанатата ситуација е информирана и Владата, Регулаторната комисија и корисниците на природен гас во државата за да се преориентираат на алтернативен енергент.

Најголем потрошувач на гас во Македонија е „Топлификација“. Директорот Димитар Хаџимишев потврди дека состојбата со снабдувањето со гас е сериозна и дека компанијата од вечерва ќе премине на мазут.

Во последните неколку години ова е шести руско-украински судир за гасот. Овојпат тој избувна откако „Гаспром“ побара поскапување на гасот, што Киев не го прифаќа, сметајќи дека е поголемо отколку што би требало. Москва ја прекина испораката на гас за Украина затоа што тамошната Влада ги нема подмирено сите долгови од минатата година. Владата во Киев, меѓутоа, тврди дека сметката е исплатена пред нова година.