Се урна авион со 148 патници во Њујорк

Патнички авион од типот „Ербас“ доцна вечерва се урна во реката Хадсон во Њујорк. Според информациите, во авионот имало 148 патници и 6 членови на екипажот.

Како што јавуваат агенциите, авионот на компанијата U.S. Airways се урнал само неколку минути по полетувањето од аеродромот Ла Гвардија.

Спасувачки екипи, полицијата, Брзата помош и пожарникарите веднаш ја преплавија реката Хадсон каде се урна авионот, во обид да им помогнат на загрозените. Авионот летал на релација Њујорк - Шарлот, во државата Северна Каролина.

Неофицијално се верува дека сите патници од авионот се преживеани. Спасувачките екипи веднаш пристигнале и брзо ги извлекувале луѓето од срушениот авион.

„Помислив зошто лета толку ниско, а потоа удри во вода“, вели еден очевидец.

Според болнички извори на четворица од патниците им била укажана медицинска помош поради хипотермија - премрзнување.

Според сведоците, причина за несреќата е удар во јато од гуски што предизвикало дефект на моторот, пренесе Си-Ен-Ен.

Како што јави Си-Ен-Ен, пилотот бил присебен и успеал правилно да го спушти авионот без да се распадне, притоа предупредувајќи ги патниците веднаш да ги отворат вратите.

Според последните информации на Си-Ен-Ен, сите патници се преживеани.

Претходно, поранешниот пилот Ерик Муди изјави „Лет низ јато од големи птици знае, инаку, да биде многу ризичен. Би рекол дека тоа беше многу успешно слетување, доколку сите патници се преживеани. Кој и да го направил тоа, завршил добра работа“.

Битолска пивара оди во ликвидација

Битолската пиварница од денеска дефинитивно оди во ликвидација. Вака одлучи Основниот суд во Битола.

На собранието на доверители, УЈП и Јавниот правобранител не ја прифатија санациската програма на доминантниот сопственик на фабриката, Ахмет Искендер, во која бараше дисконт од 60% на долговите, а останатиот износ да го врати за четири години.

Сега 120 работници останаа на улица со четири заостанати плати, и неплатени придонеси за пет години.

„За жал се донесе одлука за ликвидација на фирмата. Иако ние вработените бевме за рестартирање на фирмата, бидејќи ќе ни се исполнеа нашите услови. А нашите услови се да ни ги исплатат платите, придонесите и да бидат вработени околу 100 работници со стално решение“, изјави Цветан Петровски, синдикат на вработените.

Најголем доверител во Битолската пивара е УЈП, која побарува над девет милиони евра за неплатени акцизи и други даноци. Допрва ќе се види колку пари ќе се наплатат од продажбата што ќе следи во ликвидациската постапка.

Работници на „Руен “ официјално на принуден одмор

Светската економска криза први во кочанското стопанство ја почувствуваа вработените од фирмата „Руен интернешнл технолоџи“, поради што од денеска 127 работника и официјално се пуштени на принуден одмор, за што добија и решенија.

Тие ќе одмораат до крајот на месец март и ќе добиваат 70 отсто од својата плата. По истекот на овој рок ќе се знае нивната понатамошна судбина, дали ќе останат на работа или ќе добијат отказни решенија.

Кочански „Руен“ пред четири години беше продаден за сума од два милиони евра на фирма од странство.

Досега спојните елементи и другите делови кои се произведуваа во „Руен“ исклучиво беа наменети за пазарите на автомобилската индустрија во Европа и светот.

Во „Руен“ на работа остануваат 420 работника, со кои ќе се остварува производството.