ДНЕВНО-ПОЛИТИЧКИ настани, вести и актуелности

ЕВН ќе бара правда во Вашингтон

Принудени сме да ја бараме правдата во Вашингтон, централата на ЕВН во Виена - уште еднаш ги потсети властите во Скопје за следниот чекор на компанијата.

„Фактите зборуваат дека државната компанија ЕЛЕМ и нејзиниот генерален директор Влатко Чинговски започнаа неоснован судски процес против ЕВН Македонија за плаќање на близу 200 милиони евра, нанесувајќи и огромна штета на државата и на македонскиот народ. Бараната сума е повеќе од вкупните средства на ЕВН Македонија, што материјално би резултирало во ренационализација на компанијата“, велат од ЕВН АГ.

Барањето е спротивно и на Анекс договорот помеѓу ЕЛЕМ и ЕСМ склучен пред приватизацијата.

„Со оглед на фактот дека ЕЛЕМ е државна компанија чиј менаџмент е поставен од Владата, со тоа и одговорноста за сите негови постапки ја сноси Владата на РМ“, велат од ЕВН.

ЕВН АГ е принудена да ја оспори скандалозната судска пресуда со која на компанијата и се наметнуваат непостоечки обврски.

Со оглед на фактот дека во текот на судската постапка не добивме фер третман, а тенденциозно беа отфрлени сите релевантни докази, ЕВН, за жал, е принудена правдата да ја бара на Меѓународна арбитража во Вашингтон (САД).

Австриската компанија за време на судскиот процес приложила Анекс договор, кој според нив судот го одбил, а во него стоело дека откако ќе се наплатат старите побарувања ЕВН треба 50% од тие пари да ги префрли на сметката на ЕЛЕМ.

Според информациите, се работи за побарувања од 400.000 тужени потрошувачи - правни и физички лица. Денес меѓу нив има и компании кои веќе не постојат, но и починати лица.

Состојбата ескалираше кога судот одлучи дека ЕВН треба да му плати повеќе од 200 милиони евра на ЕЛЕМ.

Од ЕЛЕМ, во соопштение до јавноста посочија дека се сомневаат оти ЕВН веќе го има наплатено поголемиот дел од овие 6,5 милијарди денари, а не префрлиле ништо на нивната сметка.

Според соопштението, Австријците не им дозволиле на судските вештаци да проверат до каде е наплатата на старите долгови.

Не е вистина, возвраќаат Австријците, добија на увид се, но за жал вештаците од Државното биро за судски вештачења не беа заинтересирани да ги земат доказите со себе, откако претходно тоа им го сугерираше адвокатот на ЕЛЕМ, велат во ЕВН Македонија