ТВ Пинк влегува во Македонија

Аца Лукас го лансираше "Пинк 15" во Македонија

Белградскиот газда Жељко Митровиќ пред журот организираше коктел во хотелот "Холидеј ин", на кој пречека добар дел од македонската и од српската естрада, бизнисмени и медиуми. Митровиќ најави дека "Пинк 15" ќе биде македонска телевизија со 60 проценти домашна продукција

Аца Лукас за старт и Жељко Самарџиќ за фајронт, а Тијана Дапчевиќ и ѕвездите на "Гранд" меѓу нив. Вака Тв "Пинк" влезе и во Македонија, со промотивната забава на новата телевизија "Пинк 15", што се одржа завчера во скопскиот клуб "Миднајт".
Белградскиот газда Жељко Митровиќ пред журот организираше коктел во хотелот "Холидеј ин", на кој пречека добар дел од македонската и од српската естрада, бизнисмени и медиуми. Митровиќ најави дека "Пинк 15" ќе биде македонска телевизија со 60 проценти домашна продукција.
Забавата во клубот започна со диџеј, продоложи со бенд и светски евергрини, ама чашите и рацете се кренаа кога на сцената се појави најстарата ѕвезда на "Гранд шоу" и "Пинк" Аца Лукас. Пејачот кој го категоризираат во фолк или турбо-фолк жанрот, повеќе се покажа во екс југословенскиот поп-рок. Почна со неговата "Лична карта", испеја и по некоја српска народна, па рече дека неговите песни се здодевни, и ги викна Џибони, "Прљаво казалиште", "Бијело дугме". Во две песни му се придружи Тијана Дапчевиќ, која е е тазе водителка на македонскиот "Пинк". Го заменија младите ѕвезди на "Гранд", и тука сосема завладејаа народњаците. При крајот за микрофон се фати и поп ѕвездата Жељко Самарџиќ, а и самиот домаќин на забавата, Митровиќ запеа и гостуваше во една песна на бас гитара. ВИП гостите беа во ВИП сепареата горе, а ги чуваше обезбедување. Меѓу нив беше и евровизиската победничка Марија Шерифовиќ.