Дали треба превозот до училиштата да е бесплатен?

Од септември ќе се воведе нов финансиски додаток за децата од домаќинствата што користат социјална помош, кои редовно посетуваат настава, најави вчера министерот за труд и социјална политика, Џељаљ Бајрами.
Тој тоа го соопшти на собраниската седница посветена на пратенички прашања, одговарајќи на една пратеничка.
Министерството ќе доделува и посебен додаток за редовно вршење на потребните медицински прегледи за децата од таквите семејства по раѓањето и по нивната редовна вакцинација, обелодени министерот Бајрами.
Пратеничката Светлана Јакимовска од ВМРО-ДПМНЕ упати прашање до министерот за тоа кога ќе почне доделувањето парични средства од трансферите наменети за корисниците на социјална помош. Бајрами одговори дека во Министерството се подготвува воведување посебна програма за парични трансфери, која е во рамките на посебен проект на Светска банка. Програмата ќе стартува во септември, а ќе трае до крајот на 2013 година.
Целта на овие програми, додаде тој, е да се придонесе кон намалување на сиромаштијата и тоа преку помош на децата од најзагрозените семејства.