Виетнамскиот генерал Во Нгуен Ѓап, кој ги избркал Французите од Виетнам и чиј силен отпор довел до еден од најголемите порази на САД, починал вчера на 102 години во Ханој, пренесува Би-би-си.

Генералот Ѓап бил еден од последните преживеани од генерацијата комунистички револуционери што го ослободија Виетнам од колонизаторите.

Тој бил командант во Првата војна во Индокина (1946-1954) и Војната во Виетнам (1960-1975).

Во Виетнамската војна се судриле војските на Северен Виетнам во сојуз со Виет Конг и Јужен Виетнам во сојуз со САД.

Ѓап ја предводел војската на Северен Виетнам и учествувал во најзначајните битки што довеле до тоа САД да си заминат од Виетнам во 1973 година со огромни загуби.

По обединувањето на Виетнам тој се занимавал со политика и новинарство.