Демони ...!!!

(Најдов многу различни митови за тоа која е Лилит, ама многу ме мрзи да ги преведувам, а како студент на филолошкиот ни факултет малку ми е срам да ги ставам во оригинал на други јазици, па затоа го ставам ова кое што го најдов на македонски, сите кои што сакаат да знаат нешто повеќе нека ми се обратат и ќе им објаснам подетално)

Грев, сам по себе

Иако приказната за Црната Месечина е само мит, тој, во разни верзии, се провлекува до денес

Лилит, Црната Месечина, според некои легенди, е најстарата жена, првата жена на Адам, постара и од Ева. Иако приказната за неа е само мит, тој, во разни
верзии, низ магиската и алхемиската традиција, се провлекува до денес.

Таа е восхитувачкиот ноќен зол дух на сумерската, вавилонската, асирската, персиската, еврејската и арапската митологија. Во третиот милениум пр.н.е., во Сумер била Лил, разорната бура или духот на ветерот. Подоцна, меѓу Семитите од Месопотамија и е придодадено значењето “лауил”,(еврејскиот збор за ноќ), станувајќи ноќен дух кој владее со мажите и жените, предизвикувајќи им еротски сништа. Лилит, својата сексуалност ја доживува како движечка и природна. Во сите митови за создавањето, се појавува како нагонско својство на женското, кое потекнува од бога и ѓаволот и кое е на најнепосреден, исконски начин, поврзано со човечкиот вид.

Ние двајцата сме еднакви

Лилит, според кабалистичката легенда, е создадена пред Ева, во исто време кога и Адам, но не од неговото ребро, туку од земја. Ние двајцата сме еднакви, му рекла на Адам, затоа што сме создадени од земја. Потоа многу се скарале, а Лилит побегнала. Подоцна, три ангели ја нашле во областа околу Црвено Море, што била полна со развратни духови. Се обиделе да ја убедат да се подобри, но таа бесно ги одбила. Кога Адам ја добил втората жена, Ева, Лилит, љубоморна, бесно се нафрлувала врз нивните деца, ловејќи ги во замки.

Денешните амајлии, со ликовите на тројца ангели, луѓето ги носат за да ги зачуваат од злото на убиствената Лилит. Според друга легенда, кавгата меѓу Каин и Авел, всушност, настанала поради неа. Некои во неа ги гледаат трагите на андрогинот, првиот човек и инцестот на првите парови.

Станувајќи непријателка на Ева, таа ја поттикнува незаконската љубов, внесува немир во бракот. Нејзиниот дом е во длабочините на морето, а клетвите настојуваат да ја задржат таму, за да ја спречат да им го загорчува животот на мажите и жените на земјата. Како жена, која е отфрлена или напуштена во полза на друга жена, Лилит претставува омраза кон семејството, брачните парови и децата. Потсетува на трагичната слика на Ламиите во грчката митологија, чудовиштата со кои Грците ги плашеле децата.

Не можејќи да се интегрира во рамките на човечкиот живот, во меѓучовечките и општествените односи, отфрлена е во бездна. Темната страна на личноста Мадона е божицата, Ева грешницата, а Лилит? Лилит е “грев сам по себе”, под услов да се плашиме од својата совест, сопствената природа. Симболизира темнина, прапочеток, страст, разорна сила, сексуален и деструктивен нагон.

Репутацијата, што ја има во митологијата, Лилит ја добила и во астрологијата, каде и се доделени уште подеструктивни влијанија. Нејзе и е припишана одговорноста за предавство, искушенија, заведување, лаги, присила, абортуси, труења, абнормалниот физички, психички или душевен развој.

Според психолошкото толкување, Лилит е “темната страна на личноста”. Станува грев, ако одбиваме да се спознаеме и прифатиме себе си без предрасуди. Додека на Месечината и се припишуваат нашите потсвесни емоционални процеси и инстинкти, кои се појавуваат во нашата свест, Лилит претставува внатрешната активност на нашата потсвест, која ретко се појавува на површина и за која не сме свесни. Но, кога ќе се појави, нејзината енергија доминира со нашето однесување. Таа нема симпатии и милост за нашите слабости. Дејствувајќи длабоко од потсвеста, не доведува до крајност во позитивна и негативна смисла.

Виновна е за нашата емоционална несигурност и неразбирливите стравови, кои не спречуваат да ги оствариме своите желби. Ни нуди нешто што не го препознаваме како свое и од што се срамиме. Оспорувана или потиснувана, енергијата станува деструктивна, доведува до фрустрации, потиснување на сексуалните потреби, комплекс на инфериорност, хистерија и емоционално сексуална незрелост.

Но, ако се афирмира правилно, енергијата се преобразува во креативна сила, лична независност и харизма. Лилит е видот на енергија во човекот, кој одбива да им робува на моралните предрасуди. Таа е слободата, го тера човекот да се реализира како слободна личност, во сообразност со своите карактеристики и нагони.

Нејзината приказна е модерна, затоа што е бунтовна, непослушна, слободоумна во секој, па и сексуален поглед. Таа го носи лицето на денешната жена. За астрономите, Лилит е планетоид, поблизок до Земјата од Месечината, но ја обиколува побавно. Кружи околу Земјата во циклус од 124 дена. Првпат е откриен во 1618 година.

Позицијата на Лилит во наталниот хороскоп зборува за најдлабоките тајни во нејзината потсвест. Знакот и куќата во кои е, ни ги открива тајните. Ги опишува нашите инстинктивни однесувања, егоизмот, сексуалноста, потребата за деструкција и нејзината спротивност, потребата за креативност. Се смета дека од неа потекнуваат и вештерките. Претставите за понижување, бегство, пустелија, осаменост, кои ги следи пламен гнев и одмазда низ заведување, се чести и во легендите за нив. Но, и покрај тоа што се опасни, средбата со нив, може да води кон душевна преобразба.

Шаманистичката симболика зборува токму за таква потера по пророчката, преобразувачка Лилит. До 8 век, пр.н.е, во Сирија и се припишуваат својства, кои ги немала дотогаш- убивање деца. Обидите таа да се негира и потисне, почнале уште во 6 век на старата ера, но таа секогаш се враќала како заводничка и убиец на деца. И ќе се враќа, како што вели пророкот Захарија(13:2), се додека не дојде Месијата и не ги истера сите лоши духови.