ДНЕВНО-ПОЛИТИЧКИ настани, вести и актуелности

Ташковиќ ќе го тужи СДСМ за клевета

Ќе го тужам СДСМ за нарушување на угледот, за клевета и можеби за навреда. Мојот интегритет не е на продажба по било која цена, и тоа ќе им го покажам. Обвинувањето дека Ферки Демировски бил во контакт со жената, сопственик на земјиштето и дека ги поделиле парите е смешно и незамисливо, изјави министерот Глигор Ташковиќ за „Време“, кој ја претстави својата верзија на настаните.
Ташковиќ информираше дека со Сандерс се сретнал на 5 мај годинава во Лондон. - Нашата амбасада во Лондон ме поврза со Сандерс. Тој ми кажа дека има опрема за производство на био-гориво во царина некаде во Грција. Имал некакви проблеми со грчката Влада, не ми кажа какви, и затоа бараше друго место во регионот каде би инвестирал. Јас сум задолжен да привлекувам странски инвестиции, и му реков одлично, тоа ми е работа - вели Ташковиќ.
Министерот додава дека на Британецот „јасно и многу прецизно“ му укажал оти Македонија се уште има проблем со неефикасниот катастарот.
- Му реков во никој случај да не дава пари, дури ни капар, за земја, додека не добие имотен лист од катастарот, потврда од Министерството за финансии дека земјата не е предмет на денационализација и потврда од катастарот дека земјата е предвидена за намената која му е потребна - вели Ташковиќ.
Ташковиќ вели дека неговиот кабинетот на сите заинтересирани инвеститори им обезбедува по еден вработен за период до три дена. - Моите вработени им закажуваат состаноци на инвеститорите, ги придружуваат, им преведуваат, објаснуваат се што им е потребно. Тие служат нешто како водич за инвестирање во Македонија. Господин Сандерс ова максимално го злоупотреби. Не само Ферки Демировски, туку и други вработени од мојот кабинет му помагаа. Цели недели трчаа низ Македонија да му помогнат да најде земја за инвестирање. Сандерс го трошеше времето и ги злоупотребуваше нивните услуги. Тој дури бараше при првата посета на Македонија да му платиме патни трошоци за двајца од неговите луѓе, што ние секако го одбивме - вели Ташковиќ.
- По некое време Демировски најде соодветна земја кај Гевгелија, ја фотографираше земјата, му испрати фотографии на Сандерс, му подигна документи од катастарот и ги испрати кај адвокатот кој Сандерс си го одбра. Но, потоа Сандерс ја посетил Гевгелија сам, без наша придружба. Таму тој контактирал со некого во гевгелискиот катастар и побарал да го однесат до посоченото земјиште. Не знам со кого контактирал, но човекот од катастарот го однел на друго, различно парче земја, а не до земјата која Демировски му ја посочил и тогаш настанал проблемот. Ако некој извршил измама и поделил пари, тогаш веројатно се работи за човек од катастарот во Гевгелија и за сопственикот на земјиштето - вели Ташковиќ.

Шекеринска: Ништо лично, така се прави тоа во Македонија

Министерот Ташковиќ вели дека на денот кога беше објавено обвинувањето против него од страна на СДСМ, тој на неформална средба токму со лидерот Радмила Шекеринска побарал подобра соработка и помош при привлекувањето инвестиции.
- Во Собранието зборував со Владо Бучковски, Никола Поповски и Радмила Шекеринска. Им реков дека јас сум технократ, не сум партиски член и дека одговорноста за привлекување на странски инвестиции ја имаат сите, и власта и опозицијата. Им реков на пратениците од СДСМ дека мојата врата е отворена за нив, дека имаме работа која мора да ја завршиме, дека времето ни отчукува и мораме да работиме бргу. Се насмеаја и ми рекоа дека знаат како да ме најдат. Шекеринска на крајот ми кажа: „Ташковиќ, не сфаќајте не лично, така тоа се прави тука“. Во тој миг јас се уште не знаев дека нејзината партија преку прес-конференција ме обвинила за корупција. Шекеринска веројатно мислеше дека јас дотогаш сум разбрал за нивната прес-конференција и дека сум дошол да разговарам за тоа што ми го направија - вели Ташковиќ.