nekoj kje kaze mozebi i deka ne e breaking news ...... JBG ...... mozebi i ne e za onie koi ne citaat vesnici ili e imaat " darbata " da ostanat imuni na TV vestite

Причина за оваа алармантна состојба е предолгата транзиција, стресот, брзиот начин на живеење, а особено големата невработеност и се' поголемата сиромаштија

Останав без работа, морав да се задолжам за да преживееме. Во меѓувреме, ми се случи уште еден стрес - дознав дека сопругот ме изневерува. Ниту јадев ниту спиев, а немав желба речиси за ништо. Додека сфатив дека сум во депресија, веќе бев на работ на самоубиство. Оваа исповед на 45-годишната скопјанка В.П. е само една во низата животни приказни што го потврдуваат фактот дека депресијата станува „животен сопатник“ на се' поголем број граѓани.
Според лекарите, ситуацијата е алармантна, бидејќи секој втор пациент што се јавува на матичен лекар има знаци на анксиозност и депресија. Причина за ваквата состојба е предолгата транзиција, стресот, брзиот начин на живеење, а особено големата невработеност и се' поголемата сиромаштија. Од лицата што паднале во депресија, 15 отсто креваат рака на себе. Матичните лекари мора да обрнат многу повеќе внимание и порано да ги откриваат пациентите што се во депресија. Психијатрите предупредуваат дека некогаш и зад обична главоболка, може да се крие тешка депресија.

- Депресијата е поттикната од стресот, но се' уште малку пациенти се јавуваат за помош и за соодветен третман. За жал, матичните лекари не ги препознаваат маскираните депресии, чие рано откривање е многу важно. И стигмата е се' уште присутна кај психичките заболувања. Луѓето се срамат да одат на психијатар, од страв дека некој ќе ги види. Стручна помош бараат само 30 отсто од оние на кои реално им е неопходна и терапија со лекови, но и психијатриски третман - вели д-р Антони Новотни, директор на Клиниката за психијатрија.

Тој препорачува дека мора да се прескокне оваа бариера, за да се откријат причините за анксиозност кај пациентите.

- Ако некој се жали на главоболка, не може да му се даваат само аналгетици, туку за тоа мора и да се разговара - вели Новотни.

Симптоми на депресија се намален апетит, несоница, намалена желба за сите животни задоволства, за секс, па дури и за одржување лична хигиена.

- За да се постави дијагноза на депресија, пациентот треба да има четири од седум симптоми на оваа болест. Често има состојби на нерасположеност што ги нарекуваме депресија. Но, тага поради смрт на близок не е депресија, а често и за ова непотребно се земаат антидепресиви. Депресијата се лекува и амбулантски и во болница - вели д-р Горазд Росоклија, невропсихијатар и професор на Универзитетот „Колумбија“ во Њујорк, САД. Тој предупредува дека и психотерапијата е од голема важност.

- Во голем број случаи, депресијата може да се излекува, а пациентите се лекуваат за да може да се доведат во состојба да функционираат во општеството. Но, освен лекови, на болните им е неопходна и психотерапија. Погрешно е кога пациентите земаат лекови на своја рака, бидејќи секоја терапија е индивидуална и мора да е приспособена на болниот - вели д-р Росоклија.

Депресијата мора да се лекува, а опасна е бидејќи може да доведе до самоубиство. Во Македонија има просечно шест самоубиства на 100.000 жители, што е под европскиот просек. Мажите почесто посегнуваат по својот живот - се самоубиваат осум на 100.000 жители, за разлика од жените, каде просекот е 4. Во Србија има 24 самоубиства, а во Словенија 45 на 100.000 жители.

Голтаме 1 милион антидепресиви годишно

Годишно се издаваат најмалку еден милион рецепти за антидепресиви. Овој тренд е присутен од пред четири-пет години, кога масовно се зголеми бројот на издадените антидепресиви, велат во Фондот за здравство. Антидепресивите, со антибиотиците, се втори на листата со лекови според потрошувачката. На прво место се лековите за зголемен крвен притисок и срцеви заболувања.

Љубица Балабан