На столбот на срамот!

Недоволен број на персонал и опрема, неадекватни санитарни услови и стари згради. Ова е состојбата која ја констатира комисијата за стручен надзор во родилиштата низ Македонија.

Родилиштето во Штип работи со два гинеколози, а потребни се седум, а во Велес работат со еден ултразвук и еден кардиотокограф. Овие родилишта се наоѓаат во најлоша состојба.

Здравствените власти нема да стават клуч на ниедно од родилиштата бидејќи, според нив тоа не е решение на проблемот. Конкретно овие две болници се регионални центри.

Последниот стручен надзор во болниците бил во почетокот на деведесеттите години. Во 1999 година починале 11 родилки, а додека во 2005 година починале 10 родилки на 100.000 кои родиле живородени деца.

За таа цел веќе во септември ќе се испечатат протоколи, кои ќе пропишуваат како матичните гинеколози треба да ја следат бременоста.

За опремата и кадарот треба да се погрижи министерството за здравство. Според гинекологот Гордана Адамова, цело следење на бременоста започнува од матичните гинеколози. Тие се оние кои треба да проценат дали една бременост е ризична и да знаат до каде е нивната моќ.

Во стратегијата на министерството за здравство има три главни приоритети. Едукацијата на бремените жени и посетата на матичниот гинеколог  клучно за намалувањето на бројот на смртните случаи, пристапот на жените до гинеколозите  како и подобрување на условите за заштита на пациентите како и регионализација на породилиштата, да се знае која болница какви услуги може да нуди. Патронажната служба бара обезбедување на 88 возила и 400 патронажни торби.

Во последните неколку месеци починаа две родилки од Прилеп, од Гостивар, а пред неколку дена почина и родилка од Велес. Родилиштето во Прилеп одредено време поради немање основни услови за породување, беше затворено, а директорите добија и кривични пријави