Втор оглас за кафе-бар на Порта Македонија

За да седнете на кафе во Порта Македонија и да уживате во панорамската глетка на градот, ќе мора да се почека уште неколку недели. На огласот кој минатиот месец го распиша Министерството за култура, во кој бараше закупец за кафулето на Порта Македонија, иако се јавиле повеќе заинтересирани фирми, сепак огласот бил затворен без успех. Како што информираат од надлежното министерство наскоро ќе биде распишан и втор јавен повик за истата цел.

Право на учество на првиот оглас имаа само домашни правни лица, а сите кои сакаа да учествуваат на наддавањето мораа да уплатат депозит во висина од 50.000 денари.

Инаку, терасата на која ќе биде сместен кафе-барот има 172 метри квадратни, а потенцијалниот концесионер ќе треба да го најми просторот во период од пет години. Кафулето ќе може да работи осум месеци во години, односно сезоната ќе трае од 1 март до 31 октомври со работно време од 18 часот до полноќ. Терасата е опремена со инвентар за кафе-бар во кој ќе биде дозволено служење алкохолни и безалкохолни пијалаци и топли напивки. Сепак, како што беше напоменато во огласот, од кафулето нема да смеат да пуштаат гласна музика,пишува Вечер.

Ако инвеститорот сака да вложи дополнително, сите трошоци се на негов товар, а Министерството нема обврска да ги надомести. Но, во секој случај, за такво нешто мора да добие одобрение од надлежните во Министерството. Воедно, сите комунални трошоци, како вода, струја, ѓубрарина, за лифт, скалила, тоалети, се обврска на закупувачот.

За разлика од видиковецот, кој се нуди на период од пет години, за користењето на останатите простории во портата веќе подолго време има ценовник кој важи од час. Така, еден час изнајмување на просторот чини околу 6 илјади денари, два часа -10 илјади денари, а за секој нареден час се плаќа по 5 илјади денари. Во просториите на Портата може да се организираат и свадби, изложби и различни свечености. Оние што сакаат да се веселат цел ден во овој објект, ќе мора да издвојат околу 500 евра.