Македонската репрезентација

Со мислите кон Црна Гора

Најдобрата македонска репрезентација денеска, од 11 часот со првиот собир во новата 2010 година во хотелот "Александар Палас" во Скопје го означува почетокот на мини подготовките за пријателскиот натпревар кој в среда од 14:30 часот на арената "Филип Втори" не очекува против селекцијата на Црна Гора.

Сите 18 повикани фудбалери на селекторот Мирсад Јонуз се очекува да бидат на располагање најдоцна до 14:30 часот, по што веднаш треба да биде реализиран и првиот тренинг. По неколкудневната потрага по терен за тренинзи, на крај одлуката е репрезентативците претстојниве два дена да тренираат на "Филип Втори". Во зависност од пристигнувањето на репрезентативците, денешниот тренинг ќе се одржи во 15 или во 15:30 часот, а во истиот термин е планиран и утрешниот тренинг.

Денеска, селекторот Јонуз од 12:30 часот во "Александар Палас" ќе одржи и средба со медиумите.

Фудбалската репрезентација на Македонија ја победи Црна Гора

Во пријателски фудбалски натпревар попладнево во Скопје на Националната арена „Филип Втори“ пред околу 5.000 гледачи македонската фудбалска репрезентација ја победи Црна Гора со 2:1.

Ангажирано, борбено и со максимално залагање, како што најавија така и одиграа македонските репрезентативци и сосема заслужено се радуваа на крајот.

Во 27 минута Горан Пандев доби дуел на средината на теренот, му ја додаде топката на Ацо Стојков кој нафрли во шеснаесетникот до Илчо Наумоски а овој биеше неодбранливо во десниот горен агол на гостинскиот голман Вукашин Полексиќ. Три минути подоцна стрелецот на првиот гол му асистираше на Пандев кој избегна офсајд ситуација и од 15-ина метри го постигна вториот гол за Македонија.

Пандев имаше уште една голема шанса во првиот дел кога од пет метри не успеа да го совлада гостинскиот голман.

Црногорците најголемата шанса за гол во првото полувреме ја имаа преку нивниот најдобар играч Мирко Вучиниќ кој откосо од десетина метри упати удар, но Томе Пачовски одлично интервенираше.

Вториот дел од натпреварот почна со шанса за ново влезениот македонски репрезентативец Душан Савиќ кој по додавањето на Пандев шутираше право во резервниот голман на гостите Младен Божовиќ.

Марко Баша во 55-тата минута високо скокна на една нафрлена топка и шутираше под пречката, но Пачовски не дозволи да биде совладан. Тоа што не му успеа на Баша во 55 минута го направи во 62 кога по нафрлена топка од корнер намали на 2:1.

Од 72-та минута првпат во дресот со македонскиот грб настапи Александар Тодоровски.

Најголема шанса за израмнување гостите имаа во 75-тата минута кога Мирко Вучиниќ од околу 30 метри силно шутираше под пречката, но Един Нурединоски кој го замени Пачоски спаси сигурен гол.

Македонија повторно се закани во 82 минута. Славчо Георгиевски со волеј удар од 12 метри зафати една нафрлена топка од Бесарт Ибраими, но не успеа да го совлада гостинскиот голман.

Дуелот со Црна Гора беше првиот натпревар за Македонија оваа година и со него официјално почнаа подготовките за есенските квалификации за Европското првенство 2012 година во Полска и Украина. Следниот натпревар македонската селекција треба да го одигра на 20 мај против Бугарија во Софија, а серијата пријателски натпревари ќе биде заокружена на 11 август во Ла Валета со Малта.

Победа денеска забележа и младата фудбалска репрезентација на Македонија во дуелот со Србија со 1:0. Единствениот гол на натпреварот одигран на „Борис Трајковски“ во скопската населба Маџари го постигна Филип Петров, една минута пред крајот на првото полувреме.


 

Фудбалско измачување...

Во моментите кога интензивно се реализира проектот за изградба и реконструкција на нашиот најголем стадион, и пријателската средба со Црна Гора отворено демонстрираше дека веќе е неопходна итна реконструкција и на теренот на националната арена "Филип Втори Македонски".

Теренот на Филип II

Во интерес и на домашната фудбалска сцена пред се настапите на Вардар и Работнички, меѓутоа во интерес и на македонската репрезентација е неопходно максимална сериозност при доизградбата на "Филип Втори" да се посвети на зелениот терен кој неизбежно мора да добие лик согласно европските стандарди. Затоа што тоа што се случуваше на тест дуелот со Црногорците беше вистинско измачување за сите актери на теренот.

"На вака лош терен одамна не сум настапувал. Се чувствувам како да сум одиграл три натпревари", истакна по дуелот дефанзивецот на Црна Гора, Милан Јовановиќ.

Не поразлични реакциите беа и од страна на македонските фудбалери...

"Се обидуваш да одиграш максимално мотивирано, креативно, меѓутоа теренот на нашиот стадион веќе долги години не го дозволува тоа. Навистина потребно е сериозно да се пристапи и во тој дел при изградбата на 'Филип Втори'", истакна капитенот Величе Шумуликоски.

Седлоски ќе игра додека може!

Националниот тим до септември има време за подготовки, воигрување и создавање победнички ритам со кој треба да се влезе во новиот квалификациски циклус. По очајните квалификации за пласман на СП 2010 година сега мислите ги насочуваме кон ЕП 2012. Противниците се познати па затоа сега треба да се фрли акцент на тест средбите до стартот на средбите за бодови. Зад нас имаме успешен меч и победа над Црна Гора (2:1), а низ следните дуели треба да се добие костурот на најдобрите 11 со кои ќе влеземе во новиот квалификациски предизвик.

"И покрај тоа што до стартот на квалификациите има уште многу време кај нас многу работи се веќе јасни. Во изборот на најдобрите 11 познати се десетмина кои веќе се имаат изборено за позицијата стартери. Ни недостига уште еден играч за врска и за таа позиција конк*рираат Дарко Тасевски, Влатко Гроздановски, Марио Ѓуровски, а можеби и некој четврти...", истакна Јонуз за неговата визија околу стартниот тим со кој ќе тргне во новите квалификации.

Сите овие најави на селекторот се со надеж дека оние кои на последните средби беа редовно во тимот ќе имаат успешни настапи за своите клубови, ќе бидат во добра форма и што е најважно да немаат повреди до септември. Тоа значи дека на голот ќе биде Пачовски, а во одбраната како стопери Митрески и Новески. Левата бековска позиција е запечатена за Горан Попов, а десната за Лазаревски (добива конк*ренција во Тодоровски). Во средината е капитенот Величе Шумуликоски со Славчо Георгиевски и Филип Деспотовски и едното празно место за кое се бара алтернатива. Во нападот ќе бидат Илчо Наумоски и феноменот Горан Пандев.

Во оваа шема го нема најискусниот и фудбалерот кој цела деценија беше главен столб во репрезентацијата. Станува збор за искусниот и 35-годишен Гоце Седлоски.

"Седлоски ќе игра се додека може иако со него уште кога станав селектор имав разговор и му ветив дека ќе сигурно ќе биде во националниот тим се додека не дојде до бројката од 100 настапи. Тоа е голем јубилеј и голема работа која Седлоски ја заслужи. Тоа дали и понатаму ќе ни биде ставен на располагање и ќе може да помогне зависи од неговите амбиции и планови. Ако е стандарден и игра за Матерсбург ние ќе сметаме на него, но имаме најави дека по крајот на оваа сезона тој ќе има нова функција во клубот како помошен тренер...", нагласи Јонуз околу иднината на Седлоски кој на следниот дуел ќе стигне до магичната бројка од 100 настапи во дресот со државниот грб.

"Сите репрезентативци се информирани дека ќе добијат повик само доколку се стандардни. Таа практика ќе почне по крајот на оваа сезона. Тие кои имаат проблеми со минутажата ќе мора самите да донесат одлука околу тоа дали ќе ја сменат клупската средина. Најважно е сите да бидат здрави и во добра кондиција. На последните тест средби некои ги задоволија потребите, а некои не, но до стартот на средбите за бодови ќе имаме уште 2-3 проверки по кои ќе бидат јасни сите енигми околу тоа кои играчи ќе бидат во преден план...", се зборовите на Јонуз околу плановите на националниот тим во периодот кој следи.

Македонската фудбалска репрезентација својата последна проверка ќе ја има на 18 август кога го играме пријателскиот меч со Малта во Ла Вела. Потоа почнуваат квалификациите за пласман на ЕП 2012 во групата со Русија, Словачка, Р. Ирска, Ерменија и Андора.

Македонија го добива календарот за ЕП 2012

Македонската репрезентација денеска ќе го дознае распоредот на натпреварите за сопствените квалификации за пласман на ЕП 2012 во Полска и во Украина. Ждрепката во Тел Авив за време на Конгресот на УЕФА, денеска, од 14:30 часот ќе го определи натпреварувачкиот календар во нашата Група Б, откако претходно на состанокот во Москва делегациите на Русија, Словачка, Ирска, Македонија, Ерменија и Андора не успеаја да дојдат до меѓусебен договор.

Ждрепката ќе биде извршена согласно однапред определена шема на УЕФА во која секоја од репрезентациите добива позиција во групата (А, Б, Ц, Д, Е, Ф) според која ќе го добие распоредот на натпреварите. Термините за одигрување на натпреварите се: 3 и 7 септември 2010 година, 8 и 12 октомври 2010 година, 26 март 2011, 4 јуни 2011 година, 2 и 6 септември 2011 и 7 и 11 октомври 2011 година.

Покрај за нашата група ждрепката ќе го одлучи распоредот на натпреварите и во групите Ф, Г и Х каде исто така немаше договор меѓу самите репрезентации.

Ќе ги откинеме ситеее