Проблемот со името е оставен во наследство од политичарите но ние се соочуваме со него, истакна претседателот Ѓорге Иванов на трибината Историјата на толеранција на Македонија во Државниот универзитет во Тетово

- Ние до 1991 година имавме претстава за себе создадена според потребите на Југославија. Од историјата знаеме колку факти и аргументи се избришани за да опстои таа држава. Со демократијата се појавија и разни вистини што ги рушеа митовите. Се сруши митот дека нашиот јужен сосед е моноетничка нација, дека има монопол на вистината. Сега е болно соочувањето со вистината. Ним им пречи нашиот идентитет - рече Иванов.
На провокативното прашање од студент, како може да зборува за толеранција кога не го зборува албанскиот јазик и дека е нелегитимен за гласачите Албанци, Иванов одговори дека е демократ и претседател на сите граѓани, а толеранцијата се учи и се гради во меѓусебното почитување и учење едни за други.

- Го зборувам јазикот на турската заедница бидејќи живеев со соседи Турци, а почнувам да учам и албански, разбирам грчки - истакна Иванов.

Недоразбирање или тенденциозна е изјавата на српскиот претседател Тадиќ дека не го признава договорот за границата Македонија-Косово, и дека на средбата во Белград, од претседателот на Република Македонија добил уверување дека документот од 2001 меѓу Трајковски и Коштуница за границата останува во сила.

Иванов објаснува, по средбата секој останал на својот став за границата, кој е различен. Потврдува дека демаркацијата е врз основа на договорот од 2001.

„Вие ако го видовте заедничкото комунике, тоа завршува со ставот дека во однос на Косово имаме различни ставови. Они имаат свој став, ние имаме наш став. И тие ставови беа изнесени, и тоа е во комуникето јасно наведено. Во однос на Косово, Македонија и Србија имаат различни ставови. Ние имаме наш став, тие имаат свој став. Ова Тадиќ го искажува само она што е став на Србија“, рече Иванов.

Коалициската ДУИ ќе бара политичка одговорност од Иванов доколку на Тадиќ му дал такво уверување.

„Според некои информации коишто ги слушам, е дека има некоја согласност од страна на Иванов, претседателот на Република Македонија кон ова прашање. Мислам дека тоа е несериозно, што вон службената надворешна политика на Македонија. Мислам дека тоа е незрела политичка изјава“, рече Сафет Незири, ДУИ.

Георги Иванов

ВМРО-ДПМНЕ изјавата на Тадиќ не сака да ја коментира, но не и дали ако е точна, ќе бара одговорност од Иванов.

„Ние нема да ја коментираме изјавата на господинот Тадиќ“, вели Илија Димовски, ВМРО-ДПМНЕ.

За СДСМ ова е премногу сериозно прашање за импровизации.

„Не сакаме се уште да веруваме дека македонската надворешна политика се сведува на принципот едно збори дома, а друго прави надвор, бидејќи на тој начин се поткопува и руши меѓународната позиција на Македонија, а може да се предизвикаат и внатрешни последици“, изјави Игор Ивановски, СДСМ.

Сепак, бидејќи многу контроверзии го следат Иванов, од коментар ќе се воздржат до официјалната потврда на ставот.