Новото истражување откри дека гасовите кои ја формирале земјината атмосфера и океаните не потекнале од внатрешноста на Земјата туку од кометите и метеорите од кои таа била опсипана за време на Доцното обилно бомбардирање. До овие нови докази е дојдено преку тестирање на вулканските гасови, при што истражувачкиот тим откри јаснa метеоритскa трага во составот на вулканските гасови. Ваквите нови сознанија ги доведоа до зклучокот дека вулканските гасови, всушност, немале значителен удел во формирањето на земјината атмосфера и дека нејзиното потекло, а со тоа и потеклото на океаните, е поинакво, односно најверојатно можеме да го најдеме во периодот на доцното бомбардирање од гас и материја која била богата со вода и која по составот била многу слична со кометите.

Според зборовите на лидерот на проектот, научникот Др. Грег Холанд (Greg Holland), сликите во учебниците на кои е прикажана прастарата Земја со големи вулкани кои исфрлаат гас во атмосферата ќе треба да бидат ревидирани.

Според теоријата на Доцното обилно бомбардирање, внатрешноста на нашиот Сончев Систем, околу 700 милиони години по неговиот настанок, била затекната од ненадеен силен дожд од отпадоци материја од неговото формирање кој несомнено имал огромно влијание врз Земјата која тогаш штотуку се формирала. Доказите кои ги имаме за да ја поткрепиме оваа теорија засега потекнуваат главно од определувањето на староста на примероците од Месечината, што укажува на тоа дека најголемиот дел од камењата стопени при судари со метеорити (impact-melt rocks), се имаат формирано токму во овој тесен временски интервал. А поддршка за теоријата на Доцното обилно бомбардирање даваат и заклучоците од новото истражување за потеклото на земјината атмосфера.

Уметничка претстава на периодот на Доцното обилно бомбардирање

Истражувачите го анализираа криптонот и ксенонот во гасовите од горните обвивки на Земјата до кои дојдоа со земање на примерок од гасовитото поле Браво Доум (Bravo Dome) во Ново Мексико. Тие открија дека двата благородни гасови имаат изотопски траги карактеристични на материјата од раниот сончев систем која е слична со меторитите, а не со материјата која ја наоѓаме во денешните атмосфера и мориња. Со ова се дошло до заклучок дека благородните гасови кои изобилувале во внатрешноста на раната Земја не придонеле во подоцнежното формирање на нејзината атмосфера. На значењето на ова истражување додава и фактот дека тоа е прво кое го утврдува точниот состав на криптонот присутен во обвивката на Земјата поради употребата на специјалните инструменти кои можат да ги забележат суптилните траги во примероците од внатрешноста на Земјата, а кои досега не им биле на располагање на научниците.

Незадоволни од потрагата по живот на Марс, Руската вселенска агенција Роскосмос и Планетарното здружение (The Planetary Society) наскоро ќе испратат живот од Земјата на една од Марсовите месечини, Фобос. Малите меѓупланетарни патници би вклучиле бактерии, спори, семиња, ракови, инсекти и габи, сè со цел да се дојде до сознанија како биолошкиот живот во различни форми ќе се справи со вселенското патување во период од три години.

Профил на мисијата Фобос-Грант. За поголема резолуција кликни на фотографијата.

Русија веќе подолго време врши најразлични биолошки вселенски тестови со иста цел. Еден од експериментите изведен во соработка со јапонски научници, вклучуваше прилепување на комарец за трупот на Меѓународната вселенска станица (ISS). Комарецот беше составен дел на проектот Biorisk при што научниците веќе имаа сознанија за способноста на инсектот да влезе во одредена хибернирачка состојба за време на сушите во Африка. Имено, африканскиот комарец може да ја претвори својата телесна течност во трикалорен шеќер, успорувајќи ги своите функции безмалку до комплетен застој. Кога повторно почнува да врне, кристализираното суштество се рехидрира и продолжува со својот животен циклус. При овој експеримент, Biorisk комарецот опстана 18 месеци на температура која варира од -150°C до +60°C. По враќањето на комарецот, научниците му извршија здравствен преглед при што заклучија дека е “жив и нозете му мрдаат”.

Biorisk комарецот, прилично задоволен со животот во Вселената

Овој експеримент, како и идните планирани од овој тип би овозможиле подобро разбирање на тоа како луѓето би преживеале во Вселената во подолг период (можност за ставање на идните меѓупланетарни астронаути во одредена биолошка состојба слична на кома), како и тоа дали е можно одгледување на храна, одн. различни култури за прехранување на астронаутите, надвор од Земјата.

Нашиот меѓупланетарен амбасадор и еден од најпознатите екстремофили - воденото мече (тип Tardigrada)

Американски-основаното Планетарно здружение планира да испрати мал пакет со 10 различни видови вклучувајќи водени мечиња, семе и бактерии. Главната цел на овој експеримент е тестирање на хипотезата за панспермија, според која се смета дека животот може да патува од планета на планета транспортирајќи се притоа со фрагменти од планетарен материјал. Најголемиот дел на биолошкиот примерок би се наоѓал во состојба на биолошко мирување, а тестовите би се извршувале по враќањето на Фобос-Грант на Земјата доколку примерокот се врати жив.

Русија, пак од друга страна, има многу поамбициозни цели со овој проект. Вселенската агенција планира да испрати цела мини зоолошка градина на Фобос. Руските експерименти би вклучиле ракчиња, ларви од комарци, бактерии и габи и би биле посебно насочени кон набљудување на влијанието на космичката радијација врз сите овие различни видови на живот за време на меѓупланетарното патување.


Секако, освен прашањата за етичноста за вршењето на вакви тестови врз животински примерок, постојат и одредени грижи за контаминација на месечината (во случајот Фобос-Грант да не се врати успешно од мисијата). Сепак шансите примерокот да опстане на месечината без атмосфера се минимални до никакви. Во секој случај, идејата за овој експеримент е револуционерна и од огромно значење за астробиологијата.