Тој е безвременски, секси, фатален... црвениот кармин е сè само не обичен! Го користеле гејшите, проститутките, кралиците...

Иако бил познат уште од многу порано, дури во дваесеттиот век почнала неговата поширока употреба. До тогаш црвениот кармин бил прогонуван и забрануван, а заради тоа бил и идеализиран и баран од многу жени.

Тогашната верзија на овој кармин го користела и самата Клеопатра, позната по желбата и чувството за убавина. Нејзина истомисленичка била кралицата Елизабета, англиската владетелка од 16-тиот век. Таа обожавала своето бледо лице да го истакнува со црвени усни.

Во поново време истото го правела и Мерлин Монро, а сега Лив Тајлер, Гвен Стефани и многу други. Кој би можел ним да им одолее?

Против ова женско „оружје“ се обиделе да се борат сите, почнувајќи од црквата, која го забранила во средниот век, до британскиот парламент кој во 1770-та година изгласал закон со кој секоја жена која користи црвен кармин била прогласувана за вештерка. Дури и голем дел од самите жени пробале да го окарактеризираат за срамен, провокативен и потполно неприфатлив.

Вистинскиот пресврт се случил во САД за време на Втората Светска војна, кога од усните на актерските диви, црвениот кармин се доселил и на усните на обичните жени. Измачени од војната, за нив црвениот кармин претставувал синоним за подобри времиња, нудејќи им гламур кој инаку не можеле да го имаат. Токму такво чувство дава црвениот кармин и ден денес.

Гламурот кој жените го чувствуваат со него неповратно го лансираше црвениот кармин на сите козметички полици ширум светот, во различни нијанси и текстури.

За која и да се одлучите, кога ќе го нанесете, неизбежно ќе ја почувствувате неговата магија, најмногу во очите на оние чии погледни едноставно се лепат за вас.