Македонската репрезентација

 

Катанец веќе не е селектор

Раководството на ФФМ и селекторот на фудбалската репрезентација на Македонија Сречко Катанец, се договорија спогодбено да го раскинат договорот со што заклучно од 1 април 2009 година престануваат сите обврски на комплетниот стручен штаб на националниот тим.

До ваквиот епилог дојде по разговорите меѓу претседателот на ФФМ Хари Хаџи-Ристески и Катанец и заклучокот дека атмосферата во националниот тим од пред средбата со Холандија не е на потребното ниво што може негативно да влијае врз продолжението од квалификацискиот циклус и одигрувањето на важните средби со Норвешка и Исланд во јуни.

- Поднесов оставка на функцијата не поради поразот од Холандија, бидејќи според моментниот квалитет и состојбата во нашиот тим на физички план „лалињата“ беа апсолутен фаворит, туку поради нарушената дисциплина и специфичниот однос на дел од фудбалерите со медиумите. Навистина е несфатливо како еден мал инцидент се рефлектираше негативно во базата во Сустендајн и придонесе до „поделба“ меѓу репрезентативците кои почнаа да „истражуваат“ кој експресно ја пласираше информацијата во јавноста наместо да се фокусираат на тренинзите, вели Катанец во изјавата објавена на веб сајтот на ФФМ.

Тој истакнува дека ситуацијата се враќа на почетокот и во овој момент тешко ќе може да ја врати одличната атмосфера што ја имаше на стартот од квалификациите и затоа се повлекува.

- Морам да истакнам дека сум презадоволен од прикажаните игри за време на мојот престој во Македонија со мали исклучоци. Можеби работите ескалираа по оној несреќен пораз на Исланд кој ги наруши драстично нашите планови, но не и амбиции. Македонија со две победи во Скопје може да ги задржи шансите за второто место во групата и од тие причини сметам дека мора да ме наследи некој кој ќе ја врати атмосферата во националниот тим што е основен услов за добри игри во продолжението од квалификациите, изјави Сречко Катанец.

Тој им се заблагодарува на раководните луѓе на ФФМ на чело со претседателот Хаџи-Ристески кои од првиот момент, како што посочува, обезбедиле најоптимални услови за подготовки и настап на националниот тим, како и на неговите соработници во Стручниот штаб и воедно и посакува успех на македонската фудбалска репрезентација во понатамошните настапи.

Во деновите што следуваат УО на ФФМ ќе ја разгледа новонастаната состојба во националниот тим и ќе донесе одлука за кој ќе го наследи Сречко Катанец.

Кој било од нив би бил подобар избор од оваа последна катастрофа од селектор наречена Катанец.

 

 

 

Македонија има квалитет за бум!!!

Во деновите кога Македонија нема селектор се случува инвазија од имиња кои се споменуваат како можни наследници на Среќко Катанец. Меѓу првите, меѓу најсериозните и меѓу најдобрите понуди е името на Бранко Иванковиќ. Човекот кого во својата земја го нарекуваат "професор", тренерот кој зад себе има успеси на клупско и на репрезентативно ниво е подготвен за предизвикот наречен Македонија. Веќе ви најавивме дека ФФМ ќе има разговори со него, а и самиот тренер потврди дека има луѓе со кои разговара за функцијата селектор.

"За мене претставува голема чест и привилегија што сум меѓу кандидатите за позицијата селектор на вашата земја. Македонија е богата фудбалска нација. Луѓето добро знаат што е тоа фудбал и очекувано е секогаш да бидат гладни за резултати и успеси. Имате квалитет, имате фудбалери. Потребна е работа и само работа, а јас сум подготвен за тоа...", се зборовите на Иванковиќ, човекот кој мина три години на клупата на Иран со кој настапи на СП 2006 и ги има најдобрите резултати со оваа земја. Тој многу добро знае што се случува во Македонија, какви се нашите квалитети и капацитети.

"Добро ги знам Пандев и Седлоски. Пандев е екстра играч, а неговиот брат Сашко со 18 години го пуштив да игра за Динамо. За Седлоски не треба да се трошат зборови затоа што тој и тука, во Динамо, беше капитен и е вистински лидер на националниот тим. Го познавам и другите и речиси сите играат во странски екипи. Има квалитет и мислам дека Македонија може и заслужува многу повеќе. Може да се направи 'бум' како што тоа сега го прави БиХ со Чиро Блажевиќ. Тоа што читам е дека во националниот тим атмосферата не е на потребното ниво, но станува збор за ситен проблем кој брзо се отстранува. Потребно е единство, а мислам дека сето тоа може да се направи само со професионален однос кон проблемите", нагласува Иванковиќ, човекот за кого може да се каже дека е најдобриот ученик на славниот Блажевиќ.

Но нас не интересира Македонија, не интересира визијата на Иванковиќ и неговиот став околу пласманот во групата доколку тој ја добие довербата на луѓето од ФФМ.

"Ништо не е загубено. Има надеж, има начин како да се стигне со второто место во групата. За мене најважно е тоа што има фудбалери со кои може да се вклопи вистинската тактика со која би се дошло до победи над Норвешка и Исланд во јуни во Скопје. Во групата Холандија е главен фаворит, а сите други имаат свои скриени надежи. Меѓу нив и Македонија. Три бода и еден меч помалку зад Шкотска. Тоа е достижно...", потенцира Иванковиќ.

Стратегот од Вараждин кој има шампионска титула со Динамо постојано има контакти за ангажман на повеќе страни. Се споменуваше дека би можел да му биде асистент на Фергусон во Манчестер Јунајтед, да биде шеф на Шалке... Но се уште е слободен тренер и постои шанса да седне на клупата на Македонија. Сепак, дали ќе се случи тоа, ќе покаже времето. Ако одлучиме новиот селектор да биде странец тогаш мора сериозно да се обрне внимание на Иванковиќ. По Србин и Словенец сега можеби на ред е и тренер од Хрватска.