МИЛЕ КРСТЕВ: „МЕТАЛУРГ ПОДГОТВЕН ЗА ТИТУЛА!“

Во интервју за СпортАрена капитенот на Металург Миле Крстев со осврт на досегашниот дел од сезоната и подготовките и амбициите на клубот годинава.

Како течат подготовките на клубот?

„Почнавме на 11.01.2012, а тренинзите започнаа во Скопје каде што се задржавме се до 20.01.2012, потоа екипата замина на подготовки во Негорски Бањи. Тука ќе останеме до 28.01.2012, повторно се враќаме во Скопје и на 04.02.2012 заминуваме за Охрид каде ке останеме се до завршувањето на овие зимски подготовки односно до 18.02.2012. Во тој период исто така планирано е да се одиграат и неколку пријателски натпревари каде што ќе се темпира формата за продолжување на пролетниот дел од сезоната.“

Кои се амбициите на Фудбалскиот клуб Металург за вториот дел од сезоната ?

„Амбициите остануваат исти како што беше договорено уште од почетокот на првенството, а тоа е борбата за првото место, односно титула.“

Задоволни ли сте од тактичките определби на тренерот Ѓорѓи Христов ?

„Ѓорѓи Христов е пред се одличен стратег и талентиран тренер кој во досегашната соработка покажа врвни резултати. Имаме одлична игра и поставеност и доста голема соработка помеѓу играчите што покажуваат самите резултати. Се разбира дека сме задоволни од досегашната игра и се надевам дека и во иднина ке продолжиме со истото темпо и ќе дојдеме до шампионската титула.“

Ќе се засилува и дали веќе се засили Металург во јануарскиот преоден рок ?

„Не сум компетентен да одговорам на прашањево бидејќи не сум јас тој што ги донесува овие одлуки.“

Што мислите каде треба да се подобри играта на екипата, во кој сегмент ?

„По доаѓањето на Ѓорѓи Христов играта се подобри во сите линии. Иако е подобрена, сепак најголемиот проблем останува нашата лоша реализација, која се надевам дека ке ја подобриме во наредниот дел од сезоната.“

Дали оној гол од 60 метри против Хоризонт ви е најомилен ?

„Имам постигнувано многу убави голови, но овој се разбира дека ми е еден од најомилените во мојата кариера.“

Каде се  има настапувано Крстев ?

„Вардар-Неготино, Победа-Прилеп, Атинаикос-Грција, Херенвен, Гронинген, Вендам-Холандија и Металург-Скопје.“

Го продолживте договорот со Металург, тоа значи дека имате одлична соработка со управата на клубот ?

„Соработката со Металург започна во 2009 год и од тогаш до ден денес оди многу добро и се надевам дека така ќе продолжи и во иднина.Односот што го имаме воспоставено е пред се професионален и коректен како од страна на управата така и од мене. Металург е најорганизиран клуб во Македонија во сите аспекти, условите за работа се одлични и иако имав понуди од други клубови јас сум презадоволен од управата и одлучив да ја продолжам соработката на уште 3 год.“

Што мислите генерално за македонскиот фудбал и што според вас треба да се превземе за тој да ги надмине ракометот и кошарката ?

„Моментално макeдонскиот фудбал е во една незавидна положба, односно во фаза на стагнирање каде што веднаш се потребни драстични измени во секој аспект. Мое мислење како компарација на моето досегашно искуство во Македонија и надвор од неа е дека кај нас потребна е промена на целокупната инфраструктура, прво на спортските терени, условите за работа, а пред се на зајакнување и промовирање на младинските категории, кои се најосетливата група во фудбалот и нашата иднина, а од тоа зависи и квалитетот на македонскиот фудбал.“

На репрезентативно ниво сме катастрофални, мислите ли дека „странец“ како Тошак би можел да ја оспособи репрезентацијата за поголеми успеси ?

„Без коментар.“

ФФМ го одложи првенството само за мерак на својот потпретседател!

Целата рашомонијада околу одложувањето на пролетната фудбалска полусезона е за да се задоволат апетитите на Ренова, клубот во сопственост на потпретседателот на ФФМ, Кенан Идризи. Ова индиректно го навести и тренерот на тимот од Џепчиште, Влатко Костов, кој пред две недели апелираше за одложување поради тоа што немале каде да тренираат, а потврда даде и денеска, кога во изјава за спортскиот портал „Екипа“ соопшти дека одложувањето било потребно, поради тоа што „неколку екипи што останале во Македонија се соочиле со абнормални услови за работа“.

Идризи е и газда на Ренова и потпретседател на ФФМ

Само параван е оправдувањето дека на терените има снег, а чист и непобитен факт е дека стадионите ќе бидат чисти до 4 март, а единствената вистина е дека Ренова и „другите екипи“ нема да бидат во форма. Со одложувањето на пролетниот дел од сезоната, и со тоа што ФФМ им ја исполни желбата на „гипсарите“, уништена е целата работа на неколку екипи што платија подготовки во Анталија, играа пријателски средби и темпираа форма за почетокот, а не за средината на март. Вардар, Шкендија, Работнички, Турново беа во Анталија на подготовки, се подготвуваа како сериозни екипи, но само Вардар и Турново беа против одлуката за одложување. Преостанатите екипи, на ниво на аматери, седеа во Македонија кога беше снежното невреме, се туфкаа дека снегот ги попречува и ковеа план како да ја одложат сезоната. И на крај, го сковаа планот, кој им штети само на тие што визионерски ги планираа подготовките. Во нормална земја, четирите клуба би добиле обесштетување за загубеното време, пари и нерви, но…

Последно од сета оваа рашомонијада е веста дека Вардар и Хоризонт Турново писмено до ФФМ побараа стартот на првенството да се врати за терминот на 4 март, ама за тоа ќе треба да лобираат и кај другите клубови. Но, ако се знае вистинската причина за одложувањето, попусто ќе одат на преговори…

Зошто сме фудбалски Лузембург, сите тоа го знаеме, на сите ни е јасно, ама никој не сака јавно да каже или да напише...Има најмалку илјада причини, секоја од нив важна на свој начин. Еве јас ќе почнам прв да ги редам, а кога ќе се заморам, а дел од нив сигурно и ќе заборавам, Ве молам продолжете Вие со коментари под текстот...

ЗОШТО СМЕ ФУДБАЛСКИ ЛУЗЕМБУРГ?

- Затоа што оваа година славиме деценија откако тогашниот анонимус и обичен претседател на прволигашки клуб, Харалампие Хаџи-Ристески, на гласање за нов претседател на ФФМ убедливо го победи македонскиот фудбалер за изминатиот век, Дарко Панчев...

 - Затоа што Џон Тошак не ги знае презимињата на нашите фудбалери, а составот му го суфлираат неговите помошници, на чело со Бобан Бабунски...

- Затоа што фудбалерите што играат за репрезентацијата не се најдобрите, а кога ќе го облечат националниот дрес не чувствуваат никаква одговорност, чест и гордост...

 - Затоа што јавна тајна е дека повикот во репрезентативните селекции се плаќа на ваков или на онаков начин...

 - Затоа што младинските репрезентативни селекции се очајни, со чест на исклучоци, за нив воопшто не се води сметка, а уште оттаму се почнува со процесот на играње поради „посебни релации“...  

 - Затоа што во фудбалот ги нема прославените Дарко Панчев, Илија Најдоски, Чедомир Јаневски, Бошко и Милко Ѓуровски, Саша Ќириќ, Митко Стојковски, Тони Мицевски, Драган Канатларовски, и многу други истакнати фудбалски имиња...

 - Затоа што речиси сите репрезентативци кои ја остварија онаа историска победа од 11-1 над Лихтенштајн сега се далеку од фудбалот, или се заборавени некаде на маргините...  

 - Затоа што немаме ниту еден вистински стадион во државата, а на Градски прво му дадовме звучно име  „Филип Втори“, па дури потоа го правиме – фаза по фаза...

- Затоа што државата направи фудбалски игралишта кои се веќе пропаднати и никој за нив не води грижа...

 - Затоа што Првата лига ни е далеку од професионална, а најголем дел од фудбалерите играат за плата што не е поголема од 200 евра и среќни се ако врзат крај со крај...

 - Затоа што на дел од прволигашките стадиони нема ниту топла вода за туширање по завршување на натпреварите...

 - Затоа што националниот телевизиски сервис, МРТВ, или некоја друга национална телевизиска станица, не го пренесува македонското фудбалско првенство за да ја зголеми неговата популарност...

 - Затоа што најголемите македонски компании бегаат од фудбалот како од црн ѓавол, наместо да вложуваат во неговиот развој...  

 - Затоа што низ годините наназад ги снема поранешните шампиони Слога Југомагнат, Македонија Ѓорче Петров, откако нивните раководства сакаа да стават крај на анархијата на ФФМ...

 - Затоа што просториите на ФФМ повеќе наликуваат на некоја селска задруга, отколку на „куќа на фудбалот“...  

 - Затоа што сите оние кои што појавија желба да го рушат Харалампие Хаџи – Ристески, всушност сакаат да ја грабнат власта и тие потоа да удрат на крадење...    

 - Затоа што Вардар на сила го спасија од Втората лига, го фузираа со Миравци, наместо по природен пат да се вратеше во елитата...

 - Затоа што на прволигашки фудбалски меч во Кичево беше симнато македонското знаме од јарболот од навивачите на Шкендија, а за тоа никој не одговараше...

 - Затоа што „Тумбе кафе“ во Битола наликува на руина, а некогашната фудбалска гордост Пелистер сега се мачи во второлигашка конкуренција и ја сонува елитата...

 - Затоа што Беласица, клубот од каде потекнуваат Пандев, Попов, Стојков, Балдовалиев, кој беше расадник на таленти, сега е на работ на пропаст...

 - Затоа што ФК Победа беше суспендирана од УЕФА и ФИФА како клуб кој „местел натпревари“, досието и беше предадено в рака на министерката за внатрешни работи, а досега не е преземена никаква акција. За разлика од кај нас, насекаде низ светот се води жестока борба против организираниот криминал во фудбалот и лажирањето на резултатите...   

 - Затоа што членови од докторскиот тим на ФК Работнички, кои беа суспендирани поради допинг аферата на мечот со Лацио, потоа добија „Медал за заслуги за Македонија“ како дел од ракометната репрезентација на Македонија...

 - Затоа што претседателот на Вардар го покани Динамо Загреб да гостува во Скопје за јубилејот на најтрофејниот клуб, а не знаеше дека зборува со спортскиот директор Зоран Мамиќ...  

 - Затоа што петлињата, пионерите, кадетите, младинците, наместо на фудбалски игралишта учат да играат фудбал на ниви и на споредни терени...   

 - Затоа што кога имаше снег до колена, Миле Спиркоски тврдеше дека нема да го одложи почетокот на пролетниот дел од првенството, а кога пукна сонце, со „заговор“ на дел од клубовите, фудбалската пролет е одложена за седум дена подоцна...   

 - Затоа што елитен фудбал одамна нема во Велес, Кочани, Куманово, Струга, Кавадарци, Валандово, Македонска Каменица ...

 - Затоа што сите македонски фудбалери прво би одлучиле да заминат на печалба во Казахстан, Узбекистан, Индонезија, Албанија, Кипар, отколку да играат во Македонија, а подобрите лиги за нив веќе се недостижни...

Едно зошто, илјада затоа...