НЕРВОЗА ВО СДСМ ПОРАДИ СЛАБИОТ ОДЗИВ НА МИТИНЗИТЕ

Штипјани не излегоа да го пречекаат Бранко

- Повеќе од половината донесени со автобуси, се од околните градови на Штип, од Велес, од Радовиш, од Кочани, дури од Струмица и Куманово. Штипјани не излегоа да го пречекаат Црвенковски, вели Димков

Продолжува слабиот одѕив на митинзите на СДСМ. По Велес и Струмица, каде на собирите на социјалдемократите имаше далеку помал број од нивните очекувања, најголемата опозициска партија доживеа фијаско и на неделниот митинг во Штип.

Според одредени проценки 2000-3000 граѓани присуствувале на митингот, кој беше дел од преткампањските активности на СДСМ за локалните избори кои ќе се одржат идната година. Од партијата пак излегуваат со бројка од околу 5000. Како и да е ова не е бројка со која партијата би требало да се гордее. Особено што информациите од теренот говорат дека дел од присутните биле носени со автобуси од други места.

Сепак, лидерот Бранко Црвенковски е убеден во изборна победа поради лошите резултати на локалната самоуправа и градоначалникот Горан Алексов од ВМРО-ДПМНЕ. Црвенковски дури направи споредба и меѓу локалните избори и битките од Втората светска војна.
-Источниот дел од земјава е најсиромашен и колку повеќе има сиромашни граѓани, власта толку добива и поевтини гласови. За власта Источна Македонија ќе биде тоа што за Хитлер бил источниот фронт. Арач се збира од рајата, за да може султанот да си тера ќеиф. Само со пола од парите потрошени за споменици, Источна Македонија ќе цветаше, рече Црвенковски.

Пратеникот од редовите на ВМРО-ДПМНЕ од Штип, Трајче Димков во изјава за порталот "Курир" вели дека митингот во овој град е уште еден доказ за погрешната политика на СДСМ.
-Повеќе од половината донесени со автобуси, се од околните градови на Штип, од Велес, од Радовиш, од Кочани, дури од Струмица и Куманово. Штипјани не излегоа да го пречекаат Црвенковски, вели Димков.

http://daily.mk/shtipjani-ne-izlegoa-da-go-prechekaat-branko?forward=1352947