Локални избори 2009

Oспорена кандидатурата на Руфи Османи

Затворската казна за Гостиварските настани пред девет години пречка за градоначалничката аспирација на Руфи Османи.

Гостиварската општинската изборна комисија ја одби неговата кандидатура поради член седум од Изборниот законик, кој предвидува дека лицето не ги исполнува условите доколку е осудено со правосилна судска одлука на безусловна казна затвор над 6 месеци.

Османи поради незаконско истакнување на знаме на туѓа држава и немирите во кои загинаа три лица а повеќе беа повредени беше осуден на казна затвор од 7 и пол години, одлежа година и пол, а со посебно донесен закон за амнестија беше ослободен.

За Османи одлуката е скандалозна и политички мотивирана од, како што вели, некои моќници во Гостивар.

„Јас сум убеден дека стојат одредени челни луѓе на ДУИ во Гостивар, кои се поврзани и интересно и со други релации, со одредени структури на централната власт“, изјави Руфи Османи

Од ДУИ демантираат дека имале влијание на одлуката на комисијата. И тие се незадоволни од одлуката.

Според претседателот на Општинската изборна комисија Берат Абази одлуката ја донеле по консултации со органи надлежни за спроведување на изборите. Според Османи неговиот случај е застарен, и доколку се оспорува неговата кандидатура, тогаш спорна, вели треба да е и на Бошкоски, а и претходно кандидатурите на Заев и Амди Бајрам. Според правниците случајот Османи не може да се поврзува со кандидатурите на Бошкоски и Заев, затоа што не биле осудени .

Османи за функцијата ја имаше поддршката и од Нова демократија. Селмани вели дека освен што се почитуваат прописите треба да се почитува и волјата на граѓаните.