Наставни програми

Во учебникот „Општество“ за четврто одделение се набројуваат многу индустриски капацитети што со години се затворени или одамна се под стечај

Скопската фабрика за чевли „Газела“,велешката топилница и стакларницата во Гостивар се само дел од фабриките што со години не работат, но основците сепак ги учат како стопански објекти во земјава. Овие фабрики и многу други се споменуваат во учебникот „Општество“ за четврто одделение, кој е единствениот што се користи во наставата. Родителите се револтирани бидејќи нивните деца од учебникот добиваат неточни информации, а никој од надлежните досега не реагирал за да ги смени.  Во учебникот, во делот за стопанските објекти изградени по текот на реката Вардар се набројуваат многу фабрики, кои со години се затворени или се под стечај. Такви се Фабриката за стакло во Гостивар, Топилницата „Злетово“ во Велес, Хемиската индустрија за вештачки ѓубрива „Велес“, Фабриката за чевли „Газела“, за алкохолни пијалаци „Винојуг“. Фабрики се затворени повеќе од две години, но авторите на учебникот се' уште ги вбројуваат во стопанските објекти во земјава.  - Зарем ќе ги лажеме децата дека се' во земјава е розово, кога самите гледаат дека фабриките се затворени и родителите не одат на работа? Не е можно никој да не забележал што учат децата. И самите наставници знаат дека фабриките не работат, но сепак го предаваат материјалот - вели мајка на четвртоодделенка.  Освен затворените индустриски капацитети, во учебникот се набројани и фабрики што едвај работат со големи загуби или работат повремено поради промените на сопственичката структура.  Педагошката служба и Министерството за образование пред извесно време најави дека ќе се формира стручна комисија, која детаљно ќе ги проверува сите учебници што се користат во наставата, за да се утврди дали во наставниот материјал има грешки или пропусти. Најавената комисија не проработила се' уште, а од Министерството вчера не успеавме да добиеме одговор кога ќе почне да работи. Идејата за целосна проверка на учебниците се појави откако три учебници по историја за средно образование експресно беа повлечени од употреба бидејќи во нив беше објавен цртеж со ликот на пророкот Мухамед. Издавачот на учебниците веднаш отпечати нови без спорниот цртеж.