Бугарска пропаганда

Весна Дамчевска

За уставното име на Република Македонија МАНУ одамна има став и тој е непроменлив, вели новоизбраниот претседател на Академијата Георги Старделов во првата изјава по неговиот завчерашен избор.
- Имам намера да го реактуализирам документот што МАНУ го објави во 2001 година по предлогот за двојна формула на името на Метју Нимиц. Ставот е дека не смее да се менува уставното име, а овој документ ги содржи научните сознанија врз кои се базира ставот, како и неговите правни, политички и историски аспекти - вели академикот Старделов, кој на должност ќе стапи по Нова година.
Во првата изјава за јавноста по изборот, тој најави активно учество на Академијата со решенија за прашањата за кои не може да се најде решение.
- Во овој момент, прашањето со името е таков предизвик - вели Старделов, кој ја навестува својата целосна посветеност на важни прашања, кои се од корист на државата и на луѓето, а за кои само науката може да даде исцрпен одговор.
На внатрешен план, Старделов бара повеќе елан и свежина во МАНУ.
- Мојата основна идеја е Академијата да се отвори кон јавноста, кон народот и сето она што го прави и создава да им биде достапно на луѓето, да внесеме повеќе елан, повеќе свежина во работата - вели новоизбраниот претседател.
Клучните приоритети на Академијата, вели тој, ќе бидат избрани кога ќе се состане новото претседателство.
По неуспешниот прв обид за избор на претседател на МАНУ минатата недела, завчера, доцна вечерта, академиците го избраа академикот Георги Старделов за прв човек на Академијата. Академик Старделов ќе ја раководи највисоката научна институција во Македонија во идните четири години.
За потпретседатели се избрани Владо Камбовски и Бојан Шоптрајанов, а за секретар Љупчо Коцарев. Гане Тодоровски и Ѓорѓи Филиповски се новите членови на претседателството, а избрани се и секретари на одделенијата на МАНУ - Ката Ќулавкова на одделението за лингвистика и литературна наука, Иван Катарџиев на одделението за општествени науки, Глигор Каневче на одделението за математичко-технички науки, Ристо Лозановски на одделението за биолошки и медицински науки и Влада Урошевиќ на одделението за уметност.