Како се добива ХИВ-СИДА?!

Вирусот на СИДА

Од почетокот на оваа година до сега во Македонија се дијагностицирани пет нови случаи на хив позитивни и заболени од сида.

Вкупниот број на евидентирани лица е 101, а од нив 55 се починати.

Заболените со хив и сида не сакаат да говорат јавно, но сепак анонимно открија детали од нивните животни приказни.

Семејството на Стојан од Прилеп е првиот е единствен експониран случај на заболени од сида во Македонија.

Во 1993 година тој јавно проговори за сидата.

Неговата сопруга и двете деца починаа набргу, а тој е хив позитивен и живее во Прилеп, отфрлен од средината.

Најчесто во тајност

Другите заболени лица не сакаат да се експонираат во јавноста.

Доктор Александар Арников е програм менаџер на проект спонзориран од Глобалниот фонд за борба против сида:

„За жал се уште постои стигма и се уште на тие луѓе им е проблем да се јават и гласно да зборуваат за својата состојба. Имајќи ги предвид околностите во земјата ние и не инсистираме. Меѓутоа, работиме на тоа да ја доведеме средината до една фаза, во која ќе може без поголеми проблеми да ги прифати овие луѓе".

Доктор Весна Велиќ Стефановска од невладината организација МИА, контактира со заболените од хив и сида.

Преку неа, по електронски пат до нив ги пративме следните прашања:

Какво ризично однесување имале и кога дознале дека дека се хив позитивни или заболени од сида?

Како се чувствуваат сега и дали се прифатени од средината?

Добивме одговор од две лица.

Првото лице е од женски пол на воздраст од 31 година:

„Имав повеќе партнери, а понекогаш не користев кондом. Не се чувствував добро па отидов на лекар. Направив многу прегледи и тестирања и на крај лекарите утврдија дека имам сида. Секој ден се чувствувам различно. Знаат само родителите, друг никој не знае.“

Второто лице е момче на воздраст од 27 години:

„Со партнерката бев долго време и не користевме кондоми. Еден ден ми кажа дека направила тестирање и дека е болна од сида. Лекарите ми препорачаа и јас да направам тест. Не чувствував никакви здраствени проблеми, но тестот покажа дека сум хив позитивен. Никој не знае. Се преселив и живеам во друг град. Не знам како ќе биде кога состојбата ќе ми се влоши ".

Со терапија животот се продолжува

Доктор Весна Велиќ Стефановска вели дека со примање на антиретровирусна терапија, животот на носителите на хив вирус и на заболените од сида се продолжува :

„Од моментот кога ќе влезат во стадиум на сида, лицата во просек живеат две години. Меѓутоа, кога се хив позитивни, со антиретровирусната терапија можат да живеат и повеќе од 20 години ".

Анкетата во Скопје покажа дека граѓаните се едуцирани за сидата, и би им понудиле пријателство на заболените од хив и сида :

„Би се дружел, зошто да не. Сидата не се пренесува со дружење и со допир. Нема потреба да ги одбегнуваме ".