БЕСМРТНОСТА НА ФЕНИКСОТ

Жестоки борби на Шар планина се водат во моментов меѓу македонската полиција и вооружени групи на Албанци уфрлени од Косово. Најинтензивни судири има во атарот на селото Бродец, каде изминативе денови имаше информации дека се стационирани бегалците од затворот “Дубрава“, Лирим Јакупи - Нацист и Рамадан Шити.

Првичните неофицијални информации се дека има загинати терористи. Засега се шпекулира со бројката од осум лица. Од МВР информираат дека нема повредени ниту настрадани полицајци. 

Во Тетово повремено се слушаат пукотници и детонации, кои доаѓаат од правец на Шар планина, јави екипата на Нетпрес која е на лице место. 

Големата полицска акција почна рано утринава, а во неа биле вклучени и хеликоптери на МВР. Полициските специјални единици извршиле упад во селата Бродец и Вешала и според МВР вооружените групи биле разбиени за кратко време. По ова тие се разбегале кон шумите на Шар планина, а полицијата тргнала да ги гони. Борбите сеуште траат. Патот од Тетово до Попова Шапка е затворен кај населбата Жичара, каде се и бројните новинарски екипи.

Пратеничаката на ДУИ, Теута Арифи за новинарите ја потврдила иформацијата дека има загинати лица во жестоките борби што од утрово се водат меѓу македонската полиција и вооружени групи од Косово.

Арифи заедно со нејзиниот сопартиец, Азис Положани, ја напуштиле собраниската седница  и како што изјавиле за медиумите, одат на ургентен состанок на ДУИ поради драматични случувањата во Тетово.
 ?????????????