ТОШЕ ПРОЕСКИ - Книга на жалост

Македонската мега ѕвезда Тоше Проески загина утрово во сообраќајна несреќа во Хрватска.

Како што јавија хрватските медиуми, несреќата се случила утрово околу 6 часот и 25 минути, на два километри од клучката кај Нова Градишка, при судар на „Фолксваген Туарег“ со сребрена боја  и камион.

Во возилото, освен Проески кој спиел на совозачкото седиште, биле и менаџерката Лилјана Петровиќ (1958) и Ѓорѓе Ѓорѓески (1975) од Скопје кој управувал со возилото. Се претпоставува дека до несреќата дошло поради недоволна оддалеченост меѓу возилата во текот на возењето. Возилото „Фолксваген Туарег“ удрил во приколката на камионот, по што завршил во тревната површина.

Според хрватската полицијата, 26-годишниот македонски пејач загинал на лице место.

Возачот на „Туарегот“, Ѓорѓески и менаџерката Петровиќ, која е полесно повредена, се превезени во болница во Нова Градишка, потврди истражниот судија Стјепан Фрањиќ.

Според сведочењето на возачот на камионот со италијански регистарски таблици, возачот на автомобилот возел пребрзо и удрил во приколката на камионот, а потоа и во заштитната ограда.

Информацијата за загинувањето на Проески за МИА ја потврди и неговата продукциска куќа „Аворд ентертејмент“.

Македонското Министерство за внатрешни работи е во постојан контакт со хрватското Министерство за внатрешни работи и очекува потврда на информацијата објавена во хрватските медиуми, според кои, Тоше Проески утрово загинал во сообраќајна несреќа кај Нова Градишка во Хрватска, изјави за МИА портпаролот на МВР Иво Котевски.

- Уште од утрово контактираме со хрватското МВР и секој момент очекуваме официјална потврда, додаде Котевски.

Смртта на Тоше Проески е смрт и за дел од Република Македонија, смрт на дел од нашите срца кои се гордееа со него и секаде во светот зборуваа за Тоше како голем Македонец и човек кој ја сакаше многу својата земја и својата публика. Сите се сеќаваме на наговото: "ве сакам на сите".

Неговиот последен концерт беше спектакуларен и со тоа уште еднаш потврди колку навистина е голем човек во нашите срца.

Таков и ќе остане засекогаш, легенда на Македонија и на поп пеењето.