ОМО ИЛИНДЕН - ПИРИН

ЕФА ја критикува Бугарија за ОМО Илинден Пирин

Европските институции да го осудат угнетувањето на бројното македонско малцинство во Бугарија што се врши со поддршка од државните институции.

Ова го побара Европската слободна алијанса (ЕФА), влијателна партија во Европскиот парламент, во писмо испратено во петокот до Европската комисија, Советот на Европа, претседателот на Бугарија и до бугарските медиуми.

Како повод се посочува „најновиот акт на антидемократија кон македонското малцинство“, во контекст на неодамнешната одлука на бугарскиот суд повторно да не ја регистрира политичката партија на Македонците ОМО Илинден - Пирин, спротивно на одлуката на Европскиот суд во Стразбур.

Во писмото потпишано од потпретседателот на ЕФА и европратеник Гинтер Даун, се повикува меѓународната заедница „да ја осуди поддршката од државата на актот на угнетување“, а бугарските власти „неодложно да го признаат бројното македонско малцинство“.

Од Советот на Европа се бара да издејствува примена на одлуката на Европскиот суд за човекови права во полза на итна регистрација на партијата на македонското малцинство во Бугарија.

Во писмото на ЕФА се цитира потпретседателот на ОМО Илинден Пирин Стојко Стојков дека „бугарските власти преземаат секакви можни мерки за да спречат учество на партијата на локалните избори, закажани за идниот месец“.

ЕК ја повика Бугарија да ја регистрира македонската партија

Европската комисија ја повика Бугарија да ја почитува одлуката на Европскиот суд за човекови права за регистрација на политичката партија на Македонците, ОМО Илинден Пирин.

Ова го соопшти еврокомесарот за правда Франко Фратини во одговор на прашање на европарламентарецот од Групата на Зелените и Европската слободна алијанса, Микел Ирујо Амезага.

„Европската комисија ги повикува сите земји членки да ги почитуваат одлуките на Судот за човекови права. Бугарија мора да ја спроведе одлуката на судот од јануари 2006-та во однос на случајот на ОМО Илинден Пирин“, изјави Фратини.

Европратеникот го повика комесарот за правда да каже колку претставници на македонското малцинство живеат во Бугарија, имаат ли тие право на самоопределување, дали Комисијата е запозната со начинот на кој тие се третираат и дали има податоци за прекршувањето на нивните права во таа земја.

Фратини наведе дека Комисијата не се изјаснува како ќе се вика едно малцинство во држава членка на ЕУ, но дека земјите се обврзани да ги почитуваат директивите на Европската унија за заштита на сите лица во Унијата против расна или етничка дискриминација.

„ЕК нагласува дека со директивата на ЕУ сите граѓани на Унијата се заштитени од расна или етничка дискриминација. Ќе се ангажираме за да се увериме дека оваа директива е преземена коректно во националните законодавства“, укажа Фратини во писмениот одговор до Амезага.

Европратеникот Амезага во писмото до еврокомесарот Фратини наведе дека официјалната бројка од 5.071 Македонци во Бугарија, според пописот од 2001-ва, е потценета, бидејќи во пописните документи немало категорија Македонци.