Владо Бучковски

ДЕБАТАТА ЗА ОДЗЕМАЊЕ ИМУНИТЕТ ОТКРИ НОВИ СКАНДАЛИ ОД НЕГОВО ВРЕМЕ:

Истрагата за Бучко се претвора во октопод!

- Тони е натоварен како брод. Доволна е неговата Иднина инжинеринг која требаше да го направи водоводот во Тетово за шест милиони евра. Тежи многу повеќе од сите нас. Истото е и со Борче Петровски, Владо Димов, а да не го заборавиме и Маниќ, на кој за 500 евра годишно му го дадовте Воениот базен, им порача Влатко Ѓорчев на народните избраници од СДСМ

Не лажи, срамота е, ајдеееее, аууууу - вака пратеникот Владо Бучковски реагираше на вчерашните напади од пратениците на ВМРО-ДПМНЕ на собраниската седница на која се расправаше за имунитетот на екс-премиерот. Пратеникот од ВМРО-ДПМНЕ, Влатко Ѓорчев им порача на СДСМ да не го бранат толку многу Бучковски, бидејќи, како што потенцираше неговиот бодигард Тони, вреди повеќе од 10 пратеници на СДСМ.

- Тони е натоварен како брод. Доволна е неговата Иднина инжинеринг која требаше да го направи водоводот во Тетово за шест милиони евра. Тежи многу повеќе од сите нас. Истото е и со Борче Петровски, Владо Димов, а да не го заборавиме и Маниќ, на кој за 500 евра годишно му го дадовте Воениот базен, им порача Влатко Ѓорчев на народните избраници од СДСМ.

Тој го обвини Бучковски дека е виновен за изгубената војна во 2001 година.

- Проблем Ви е што сите Ви се во затвор. Сите финансиски афери потекнуваат од Вашето министерство. Вашите соработници пропеаја колку пари имало за Вас, колку за кампања, колку за другите. Да, да, пред истражен судија признаа кој колку земал и колку од парите завршија во кампањата 2004 година. Проблем Ви се случаите со оружјето, Бачило, Домот на АРМ во Велес, Миле Драгиќ, изјави Ѓорчев.
И неговата колешка, Ружа Ѓорѓевска, го спомена воениот конфликт, обвинувајќи дека поради недостин на аргументи, Бучковски ја покажува својата некултура и вулгарност.

- Вие сте виновни за Љуботен, за Карпалак и сите други. И одамна требаше да одговарате за тоа, кога бевте министер, рече Ѓорѓевска.
За време на говорот на Ѓорѓевска, Бучковски изгуби контрола, се сврте кон пратениците на ВМРО-ДПМНЕ, посочувајќи му на Ѓорчев дека е копиљ, а дека Ѓорѓевска тресе глупости. Обвинувањата од пратеникот од позицијата, Васко Шутарев дека Бучковски царинарниците на граничниот премин Богородица, при неговото задржување на граница, ги прашал што работат, во која држава работат и дека нема држава.

Екс-премиерот му рече дека е хоштаплер. По некое време, реши да му се извини за тоа хоштаплер, но сепак, му посочи дека премногу лаже.
Навреди имаше од сите страни. Никола Рилковски од СДСМ му се обрати на Ѓорчев со зборовите: "Навистина си убав, со убава фризура, со клопче позади, чиниш женско е. Но, женските хормони користи ги за друго, а не за плукање во погрешна насока". Неговиот колега Иван Ивановски го обвини Ѓорчев за морбидно и микрофилско однесување и заради користењето на името на покојниот претседател Борис Трајковски. И Ацо Киров од СДСМ му се обрати на претседателот на Собранието, Љубиша Георгиевски барајќи од него говорите на Ѓорчев да бидат снимени на ЦД и наместо да му дозволуваат да збори, на седниците да се пушта ЦД, бидејќи тој постојано едно исто зборува.

И денеска, до затворањето на весникот, во Собранието се слушна се и сешто, но не се случи гласањето за одземање на имунитетот на екс-премиерот Бучковски. Тој на почетокот на седницата побара од спикерот Георгиевски повторно да и напише писмо на истражната судијка за да се информира до каде е истражната постапка. Според него, беспредметно е да се разговара за неговиот имунитет кога веќе истражната постапка е завршена. Но, Љубиша Георгиевски смета дека нова преписка со судијката ќе значи вршење на пресија врз неа.

- Даде Господ да се браните од слобода. Ние немавме по што да одлучуваме, се додека не дојде писмото од истражната судијка дека истрагата не е завршена, посочи Георгиевски. Тој, пак од Цветанка Иванова од СДСМ беше обвинет дека повторно во Собранието се однесува како режисер, исполнувајќи ја партиската задача којашто ја добил во четвртокот вечерта сите пратеници од ВМРО-ДПМНЕ да ги прочитаат говорите на партискиот штаб. Од него побара претходно да ги провери говорите, бидејќи тие биле полни со омраза и ширеле национална омраза.