Ја губат ли грците битката за иметo?

„Голема Грција“ виси на многу јавни ѕидови

Атина реагира на картата на „Голема Македонија“, но молчи за Историската карта на Грција отпечатена од Парламентот, во која се вклучени делови од Турција и од Албанија, а некои топоними во Македонија се напишани на грчки јазик, реагира Виножито

Додека грчката влада постојано зборува за „експанзионистичка пропаганда на Скопје против нашата држава“, никој не се потрудил да зборува за однесувањето на Грција, реагира партијата Виножито. Повод за ваквата реакција е Историската карта на Грција, која во 2000 година ја отпечати грчкиот Парламент. На картата има легенда „Обединувањето на Грција“.

Виножито, партијата што ги претставува Македонците во Грција, посочува дека на таа карта дел од територијата на Република Турција е претставена како дел од „унитарниот грчки свет“. Станува збор за територијата во Мала Азија околу Смирна, источна Тракија, островите Имврос и Тенедос, кои на картата се претставени како грчки територии.

„Се разбира, националистите и криптонационалистите во нашава држава би можеле да се правдаат, тврдејќи дека картата не е експанзионистичка, туку ја опишува реалната состојба на теренот по Севрскиот договор од 1920 година. Слична аргументација може да користи и секој Македонец националист тврдејќи дека Бук*решкиот мировен договор од 1913 година и познатата карта од делењето на македонската територија помеѓу трите држави не претставуваат експанзионистичка пропаганда, туку опишување на реална состојба во едно реално време. Значи, која е суштинската разлика помеѓу насловите Историска карта на Грција (1920) и Историска карта на Македониј“ (1913)?“, прашуваат од Виножито.

На истата карта просторот на јужна Албанија е наречен Северен Епир, а се вклучува и Кипар.

„Чудото со гореспомената карта е тоа дека ‘украсува’ голем број административни згради во Грција како што се општи простории, полициски станици, па дури и грчки амбасади во странство. На картата се оди до таму да се користат грчките називи Монастирио и Стромница за Битола и Струмица, кои се на територијата на Република Македонија“, истакнуваат од Виножито во реакцијата.

Тие додаваат дека грчката дипломатија ги изостави и аргументите за „културното наследство на Грција“, „крадењето на името Македонија од Скопје“ и сличните несериозни аргументи, кои биле дочекани со иронична насмевка од странските соговорници.

„За жал, нашата дипломатија се обидува втор пат да стане жртва на разни Кофосовци, Мерцосвци, Самарасовци и други предводници на антимакедонската кампања од 90-тите, кои со помош на регрутирани ‘научници’ наголемо се насочуваа кон темата за ‘експанзионизмот на соседната држава’, заборавајќи дека нашата куќа е веќе ‘извалкана’ со такви ‘ѓубриња’. Се издаваат двојазични изданија со карти на ‘Голема Македонија’ за да ги користи грчката дипломатија, а ‘кутрите’ немаат помислено на стотиците карти во грчките учебници што пропагираат грчки иредентизам кон соседите, карти што не се наоѓаат само во грчките учебници, туку и во изданија на највисоките тела на грчката држава“, реагираат од Секторот за политичка антропологија на Виножито.