ДУИ партнер во владата на ВМРО-ДПМНЕ

 

 

Договорот Груевски Ахмети за барање решенија за јазикот и борците на ОНА почна да се реализира.

 Откако опозицијата категорично одби да се вклучи во дијалогот ВМРО-ДПМНЕ ДУИ, вчеравечер се сретнаа работните на двете партии. Составени се тимовите и на владејачката партија – во нив се високи функционери на ВМРО ДПМНЕ – Гордана Јанкуловска, Зоран Ставревски и Трајко Вељановски ќе ја утврдуваат употребата на албанскиот со Муса Џафери, Џевад Адеми и Изет Меџити. Трајко Славески, Силвана Бонева и Илија Китановски ќе бараат решение за статусот на инвалидите на ОНА и на семејствата на загинатите борци. Од ВМРО ДПМНЕ денеска не коментираа зошто премиерот не беше искрен кога рече дека овие барања се неприфатливи за неговата партија. Ја обвинуваа СДСМ што не прифати да биде дел од состаноците со ДУИ.

„Нашите средби не се тајни, познати се, нема таен договор, Шеќеринска кога го тврдеше ова пред еден месец не ја зборуваше вистината, бидејќи со нејзиниот ментор сака да ја блокира РМ“ – рече Влатко Ѓорчев.

Партијата на Ахмети е задоволна што прашањата се конечно на маса. Се воздржуваат од дополнителни коментари зашто ветиле конструктивност пред ВМРО ДПМНЕ.

„Нејќам да се враќам во минатото, седнавме на одделни средби за јазикот и за она, ај оставете ни простор да најдеме решение“ – рече Џевад Адеми.

Јазикот се договара во присуство на американците. Разговорите за статусот на борците на ОНА ќе ги следат европјаните. ДУИ има свои предлог верзии и за двете прашања. Вчера било договорено ВМРО ДПМНЕ да подготви свои, па потоа да се направи обид за заеднички прифатливи решенија.