Владо Бучковски

Политичка зрелост и на Владата и на опозицијата, само од тоа ќе зависи започнувањето на преговорите со ЕУ. Ова е акцентот на денешните средби на македонската делегација со Европарламентот пред утрешната дебата за извештајот за Македонија во Стразбур.

Како што изјавуваат за А1 извори од овие разговори, европарламентарците бараат имплементирање на договорот, но и предупредуваат дека е нарушен имиџот на Македонија со политичката нестабилност и лошото менаџирање на меѓуетничките односи.

Причина за загриженост кај македонската делегација е и силната грчка офанзива, но и предупредувањата на некои од европарламентарците дека на Македонија и се потребни силни партнери и лобисти, целејќи на силната десница која во моментов суверено владее во Европа.

А, од друга страна, очигледно дека на Македонија и се наклонети помалите партии - „Зелените“ и либералдемократите.

Утре е дебатата за Македонија, а после тоа во четврток следи гласање во Европарламентот во Стразбур. Шеф на македонската делегација е Иван Анастасовски, еден од членовите е и екс премиерот Владо Бучковски.