АТЕИЗАМ

Пациент од кочанско починал оти немал син картон

Маре Стоилова

Дали немањето на едно парче син картон, 38-годишниот Гоце Митев од кочанско Соколарци го плати со живот? Неговото семејство тврди дека болничката администрација го убила сиромашниот аргат, кој преживеал мозочен удар додека работел на оризовите полиња.

Митев во состојба на бессознание бил примен во кочанската болница, но таму не работел апаратот за снимање, а медицинската сестра била на одмор.

Матичниот доктор го препратил во Штип, каде не му била укажана помош, пациентот не бил прегледан и не добил соодветна терапија.

„Го молевме, тој го фрли упатот на земја. Ни рече, не сакам да го читам и го пушти на земјата“, изјави Станка Митева, сопруга на починатиот.

„Рече, човекот да се испушти, не сакам ни муабет да правам, а не па упатот да го гледам кога немате документи“, рече Македонка Митева, сестра на починатиот.

Беспомошни и испаничени, Митеви се вратиле дома, заедно со пациентот кој во меѓувреме се освестил и се жалел дека се чувствува многу лошо. Молел за помош, барал лекарства, но наместо соодветна терапија, од сопругата на своја рака добил само еден лексилиум.

Овој седатив не му го решил проблемот. Семејството го чекало понеделник, за да обезбеди син картон, но тие два дена биле кобни за невработениот татко на две малолетни деца. Тој починал во неделата.

Од штипскиот оддел на невропсихијатрија не се сеќаваат на конкретниот случај. Дежурниот доктор го образложи правилото од управата.

„Без здравствена книшка, без син картон и без лична карта пациенти да не се примаат. Ако бил таков случајот, веројатно пациентот не е одбиен, туку нему му е кажано дека нема исправна медицинска документација и ако сака да биде прегледан, треба да си плати на приватно“, вели Ѓорѓи Џорлев, Р.Е. „Невропсихијатрија“ - Штип.

Семејството Митеви ќе бара судска разврска на овој случај. Ги повикува сите надлежни државни институции да ја исправат оваа неправда.