Уредена во духот на делата на Енди Ворхол, оваа еклектична трпезарија може да се пофали со неколку различни стилски карактери. Како дел од вила изградена во далечната 1896, која му припаѓала на тогашниот богат земјопоседник Џејмс Ирвин Вториот, трпезаријата била уредена првично во аристократски стил. Првата промена доаѓа по периодот од 1906 до 1947 кога вилата останала напуштена, за потоа да биде преземена од нови сопственици што ја уредиле и ја реновирале во традиционален стил. Третиот сопственик е двојка што не била обожавач ниту на аристократскиот, ниту на традиционалниот стил, туку на модерниот современ дизајн и уметностите.

Оттука сопствениците го ангажирале дизајнерот на ентериери Џон К. Андерсон да развие нов, инвентивен дизајн за трпезаријата. Новиот енергичен изглед може да се забележи уште од главниот влез на куќата. Оригиналните црни ѕидни панели се декорирани со четири од познатите литографии на Ворхол и трпезарискиот простор добил ефектен поп-арт лик. Всушност, црните панели биле идеалната позадина за сликите на Ворхол бидејќи на неа тие оживуваат и доаѓаат до полн израз. Ѕидните површини се надополнети со килим на пруги во силни бои познат како „Paul Smith“.