Украсете ги свеќите со цветови!

 Направете прекрасни цветни декорации од свеќи кои ќе го освежат просторот во вашата соба. Се што треба да направите е да поставите цвеќе или лист врз свеќата. Потоа со загреана лажица на оган и со задната страна поставете го врз свеќата.

Ова м оже да го направите на голем број свеќи и со многу цвеќиња. За да и дадете сјај на свеќата ставете ја во измешан топол восок. Внимавајте слојот на восокот да е тенок за да може да се гледаат листовите.

Направете сами: Романтични декорации со стара тантела

Одамна веќе не се користат рачно изработените миленца кои порано служеле за декорација на масите, каучите или како подароци за во домот.

Не треба да ги фрлиме, ниту да ги уништиме, но не мора само да ни ги полнат фиоките и орманите, ако имаме интересни креативни идеи со кои можеме да ги промениме и искористиме во модерното секојдневие.

Овде се неколку идеи како да им дадете свежина и убавина на вашите стари работи, без да трошите пари за да купите нешто слично фабрички изработено, кое можеби многумина го имаат.

Вака ќе имате одлична забава во вашето слободно време и оригинални изработки.

Свеќници

Можат да бидат во различни големини и различни видови. Потребно е да искористите некои стари стаклени чашки и теглички.

Од тантелата којашто ја имате исечете поширока трака колку што е висока чашата или теглата а во должина според ширината колку што треба да ја обложите.

Добро би било да внимавате на линиите и шарите за да имате целина во декорацијата.

Штом ја исечете лентата, зашијте ги двата краја, така што ќе направите обвивка низ која ќе ја протнете чашката, односно теглата. Ставете внатре една свеќа-пловка и запалете ја.

Ќе добиете интересен и романтичен изглед.

Бележник

Вашиот стар бележник, некоја тетратка или тефтер, можат да добијат интересен изглед и дизајн, кој денес може да го купите и низ продавниците, но зошто да не се забавувате и да си го направите слободното време интересно.

Потребни ви се ножици, спреј и селотејп. Исечете тантела доволно за да го обложите бележникот, од внатрешната страна зацврстете ја со селотејпот, а потоа испрскајте ја со спрејот.

Оставете да се исуши и одлепете ја тантелата. Целиот нејзин дизајн ќе остане ископиран на кориците од бележникот. Можете да си играте и со спрејови во различни бои.

Саксии и чинии

Вашите саксии во дворот и чиниите на трпезата за гости, не мора да бидат исти како оние на соседите.

Со малку креативност можете да им дадете нов и интересен изглед. Исечете ленти со различни димензии и дезени од вашите миленца, стари завеси или прекривки и со помош на дрвофикс или некое друго позацврстувачко лепило, залепете ги на дел од чиниите или обложете ги цели саксии.

Чанта

Бидете сами дизајнери на своите чанти. Тантелата е сè уште во мода. Може на некоја стара, излитена чанта да ѝ залепите некој дизајн на тантела или пак да направите целосно нова едноставна плик-чанта.

Купете околу половина метро материјал од скај, кожа или некој кој вам ви се допаѓа, но да биде поцврст, за да може да го задржи обликот, еден патент и лепило.

Старата тантела може и да ја обоите, ако сакате да ви одговара на некоја посебна комбинација. Материјалот преклопете го и зашијте го од внатрешната страна, а претходно зашијте го и патентот.

Откако ќе го добиете бараниот облик, премачкајте го со лепило и обложете го со тантелата. Ќе добиете одлична модерна чанта.

Направете прекрасни сатенски ружи

Чекор по чекор: Направете ги најубавите есенски декорации

Ако чувствувате дека му е потребна промена на вашиот дом, почнете од деталите. Не само што се наједноставен начин за веднаш да го разубавите просторот, туку со додавање ситни детали низ домот ќе заштедите и пари за реновирање.

Есента е идеално време за да внесете боја во својот дом.

Доколку немате идеја, погледнете некои од интересните предлози со есенски декорации.

1. Ваза со цвеќе

За оваа ваза потребни ви се обични тегли, спреј во црвена или портокалова боја, коноп и вештачко цвеќе. Теглите испрскајте ги така што боите ќе се прелеваат, оставете ги да се исушат и намотајте го конопот околу нив. Врзете машничка и на крај ставете цвеќе по ваш избор.

2. Есенска кошница

За овој интересен аранжман не е потребно да користите бои, туку доволно е да имате една кошница со средна големина, вештачки листови и различни есенски украси како тиквички и шишарки. Многу е едноставен, а ефективен аранжман кои децата посебно го сакаат.

3. Есенски свеќник

За овој пресладок есенски свеќник потребно ви е лепило, стаклен сад, вештачки листови и коноп. На чинијата залепете ги листовите, заврзете ги со конопот и на крај ставете ја внатре свеќата.

4. Шарен кафез

Уште еден интересен аранжман можете да направите така што ќе го наполните малиот кафез за птици со различни есенски мотиви. Може да користите вештачки листови, шишарки и тикви, а вие можете да го наполните со што сакате.

5. Црна тиква

Тиквите се во тренд, особено црните. За оваа интересна декорација потребен ви е спреј во црна боја и бел маркер. Кај оваа декорација интересно е тоа што можете да напишете што сакате или да оставите некому порака.

Никако не ги фрлајте! Креативни начини како да ги искористите старите грамофонски плочи

Ако немате срце да се одвоите од старите грамофонски плочи кои ги чувате со години, еве неколку интересни и корисни решенија.

Зошто да ги чувате на полица, кога може да им дадете корисна намена? Како масичка, подметнувач за чаша или часовник...

Со малку вложен труд може да направите ретро декорација за домот.

Направи сам: 3D ѕидни декорации во домот

Разните бои на ѕидовите или тапетите и сликите во рамки се веќе вообичаени и здодевни. За промена добро е да внесете малку повеќе колоритност и живост со декорации кои сами ќе си ги направите.

Според вашиот стил и вкус, направете некоја 3D декорација која ќе изгледа како да излегува од ѕидот или ќе може да се допре и да се гледа од повеќе страни.

Погледнете некоја од следните идеи и обидете се истите да ги направите за во вашата соба.

1. Хартиени цветови во боја

За нив е потребно малку поголемо трпение и умешност за да ги изведете на правилен начин и да успеете да направите целосна комбинација. Потребна ви е хартија во боја или доколку е бела, тогаш ќе ви требаат спрејови со кои ќе ги обоите за да добиете поголема колоритност.

2. Уметничко облаче

Со спојување на неколку картонски кругови, кои претходно ќе ги исцртате или обележите со линии во боја, некои со поголеми, некои со помали димензии, залепени едно преку друго ќе ви дадат интересно уметничко облаче кое е совршена декорација во собата на оние со понеобичен стил.

3. Отворени книги

Старите книги чија содржина не ви се допаднала може да ги искористите и како ѕидна декорација. Отворете ги на средина и превиткувајте ги навнатре страниците.

4. Љубовен ѕид

За ова не ви треба некоја посебна умешност, туку малку повеќе време и трпение за да исечете многу срциња од хартија кои ќе ги поврзете на рибарски безбоен конец и ќе ги закачите на поголема закачалка или друга шипка во вид на големо срце.

5. 3D триаголници

Уште една уметничка декорација за оние со посебен вкус кои сакаат нешто понеобично, а едноставно. Лесно се изработуваат триаголниците, еден по еден и се спојуваат на едно место кое ќе го одберете на ѕидот.