СЕКСУАЛНА ЕДУКАЦИЈА на децата во ера на интернет

Што е Sexting?

Кованица од зборовите sex и  texting, размена или испраќање на пораки, слики, видеа... сексуално-експлицитни или со сексуална конотација. Се испраќаат на некој во кој детето има доверба, несвесни дека таквиот материјал се смета за педо-порнографски, несвесни дека она што ќе се стави на интернет може да остане и трајно неизбришливо и дека за неколку секунди може преку интернет-мрежите да биде испратено до непознат број луѓе... и ете проблем! Понекогаш она што се прави поради игра, за привлекување внимание, за предизвикување желба, како некаков доказ за љубов или-не-знам-што, може да заврши со уништена младешка психа, со психијатриски случаи па дури и со самоубиства...

Штом некој таму ставил ограничување од 13 години за отварање профил, значи има некоја причина зошто е ставено тоа. И овој има, и оној има... не е причина и моето дете на 9-10 години да има профил на ФБ или било која друга социјална мрежа. Има време за се, зошто да му го кратам детството и што побрзо да го туркам да влезе во светот на возрасните? За побрзо да му здосади? За да кога навистина ќе стане возрасен човек/жена, од досада и апатија да посака еден обратен процес, да се врати во детството или што би се рекло, да збудалува на стари години?

Секој период од животот си има своја функција во развојот на психата и на личноста, а детството е еден од најважните. Родители сами си ги вадат децата од тој безгрижен свет, од светот на игрите и куклите и ги буткаат во светот на возрасните, кој знае да биде многу валкан и неразбирлив за деца на таа возраст. Се товарат децата со грижи или се оставаат сами на себе да копаат по тој виртуелен свет, без упатства и укажување како да се заштитат. Скоро секој ден има примери по медиумите за злоупотребени деца. И скоро секој родител кога ќе слушне или прочита такво нешто, ќе си рече: „Не бе, не е можно на моето дете да му се случи такво нешто. Не, моето дете е паметно и не прави такви работи.“  Сигурни сте?

За да стекнат некакв виртуелна популарност, да се истакнат, да освојат симпатии, внимание, дечковци.... девојчиња кои уште не добиле или само што ја добиле првата менструација, се натпреваруваат по интернет која поразголена слика ќе стави. Мајки се гордеат дека нивните 3-4 годишни ќерки научиле да се шминкаат како возрасни жени, да балансираат на нивните штикли, да играат и мешаат со газињата како Џеј Ло и да одат на школо како тетки облечени за на свадба. Дали знаеме што им се случи на популарните девојчиња од шоу бизнисот, прерано созреани и изгубени во светот на возрасните? Мајли Сајрус, Линдзи Лохан, Бритни Спиарс... се само некои примери за девојчиња откорнати од детството, а сега веќе длабоко заглавени во проблеми, какви што никој родител не би посакал за своето дете. А сепак нашите деца се поистоветуваат со нив, ги земаат за идоли и ги копираат како модели.

Дали ни е јасно какви пореметени личности може сами да си направиме од своите деца? И дека вакви неубави приказни не им се случуваат само на популарните девојчиња/момчиња од шоу бизнисот, туку се почесто и на нашите деца или на некое од соседството?
Не за џабе психолозите и психијатрите укажуваат и алармираат на тој Hurried Child Syndrome, кој од децата прави минијатурни чичковци и тетки со сеуште несозреани глави во кои збрката станува се поголема...




Изменето од Анастеа - 21.Јануари.2015 во 11:29

Памтиме. А ако не памтиме, си запишуваме.

Нормално е и природно децата да се технолошки понапредни од своите родители. И ние сме биле понапредни од нашите, и децата на нашите деца ќе бидат понапредни од нашите деца... и така си оди тоа. Нема тука ништо спорно или дискутабилно. И не тоа воопшто поентата на темава. Освен дека родителите треба многу повеќе да се едуцираат од своите деца и да бидат пофлексибилни кога е во прашање користењето на современите технологии.

 И не само технолошки, ами и биолошки, секоја нова генерација е понапред во развојот од претходната. Пубертетот кај младите доаѓа се' порано и порано. Според еден медицински податок, на средината на минатиот век, средна возраст на која девојчињата добивале прва менструација, било 16-17 години. Денеска таа средна возраст е 12 ипол години.

Не знам од каде тој податок за илјадници години наназад. Знам дека ова напишаното погоре е дел од некои официјални медицински статистики, базирани на документирани истражувања. Тоа се средни т.е. просечни статистички вредности. Во тој просек влегле и бројките над 16-17 години, како и оние под 12 години. И Евреите се само дел од просекот, а средните вредности се разликуваат и по земји, како и по други критериуми (урбана/рурална средина на пример, начин на исхрана...).


И тоа славење на првата менструација на 12 години, како некоја трансформација на девојчињата во “самостојни жени , одговорни за своите постапки“ ми е многу преурането.
Првата менструација е само фаза од пубертетот, со кој детското тело се развива и доживува физички промени. Тој момент  може да се смета за сексуална, биолошка или полова зрелост, но не и за психолошко-емотивна зрелост. Уште помалку па едно 12-годишни девојче, кое штотуку добило менструација, и сеуште психолошки несозреано па дури и когнитивно-несвесно за некои свои постапки, да се смета за самостојна жена.

Кога сум кај менструацијата, не сум знаела дека постои филмче од Дизни баш на оваа тема. Кој би рекол вакво нешто уште од 1946та година , а на денешно време сеуште има мајки кои се срамуваат да им објаснат на своите ќерки што е менструација.







Изменето од Анастеа - 24.Јануари.2015 во 01:36

Анастеа напиша: Не знам од каде тој податок за илјадници години наназад.

Изменето од Messenger - 24.Јануари.2015 во 07:34

Добро Меси, не мислев јас на еврејските традиции, туку дали има некој поглобален податок, не само за евреите. Ама ОК, статистиките и не се толку важни. Мене поважно ми е ова:

Messenger напиша: А за тоа дали некој ментално и психолошки е зрел или не на 12-13 години е сосем друга работа. Не би навлeгувал сега во тоа за да не ја расплиниме темава, но само ќе речам дека многумина не осозреале цел живот. Патем, сексуалната активност воопшто не зависи од менталната и психичката зрелост.

Напротив, би сакала да ја прошириме темава малку повеќе. Затоа и напишав во воведот дека ќе соберам повеќе сегменти од неа во еден заеднички именител, а ти со твојот коментар допираш точно еден од нив: кога настапува психолошка/ментална/емотивна зрелост кај децата?

И медицински не е точно дека првата менструација, по дифолт значи психолошка зрелост. Како функционира и како се развива мозокот кај децата? Функционира како и  кај возрасните, само што некои делови сеуште му се во фаза на развој, недоразвиени во периодот на адолесценција.

Најпросто медицински, како на немедицинско лице, вака ми беше објаснето: мозокот е исто како куќа на три спрата. Првиот спрат или подрум е дел кој ги регулира примарните биолошки функции и инстинкти, основните потреби за преживувањеи опстанок. Глад, жед, спиење, репродукција, дишење... сето тоа е сместено во подрумот.
Втор спрат, емотивен мозок, во кој се сместени задоволства, емоции, страст, болка, радост, тага , лутина, страв...
Трет спрат, когнитивен дел, во кој е сместен разумот, како што ние си го викаме т.е. способноста за рационално размислување, за анализа и обработка на информации, за носење одлуки, проценка на ризици и последици...

Човекот, споредено со живеењето во ваква куќа на три спрата, најголем дел од секојдневието го поминува на средниот спрат. А за адолесцентите може да се каже и дека не излегуваат од таму. Тој таванскиот дел кај децата во пубертет штотуку почнува да се оформува комплетно, па затоа тинејџерите/адолесценти често носат избрзани, непромислени, импулсивни, штетни одлуки. Тие се водат од својот емотивен мозок, од моменталните задоволства, импулси, желби, возбуда... Се додека тој когнитивен/рационален фронтален дел (кортекс) од мозокот не созрее целосно, детските мозоци си функционираат во ситуација на хормонско бомбардирање.

Улогата на родителите и воспитните лица е да им помогнат на децата да си изградат еден “лифт“ во главата, кој ќе се движи брзо помеѓу вториот и третиот спрат, разменувајќи информации. Т.Е. да се упатат децата на водење внатрешен дијалог помеѓу емотивниот и рационалниот мозок, како некој вид на вежба или игра. На пример:

Емотивниот: Ми се допаѓа тоа, ме возбудува и ќе го направам!
Раицоналниот: Полека, знам дека ти се допаѓа, ама прво размисли што е најдобро за тебе и за другите.
Емотивниот: Што ми е гајле за другите? Ќе го направам и точка!
Рационалниот: Замисли, и на силувачот така не му е гајле за другите. Убаво ќе ти биде да бидеш силуван?.... и такви-ми-ти-прикаски....

Децата вака вежбаат да прават разлика помеѓу ризични и неризични акции и одлуки, да разберат дека секоја одлука и акција носи и последици. Арно ама, како што рече Меси, има и возрасни кои не осозреваат цел живот. Т.е. такви на кои тој третиот спрат, таванот им останува како отворено градилиште низ кое дува промаја. Најлошо е кога ваквите “возрасни“ ќе се спојат некако со хормонизирани адолесценти, тогаш настануваат проблемите. А во денешни времиња, таквите фатални комбинации се уште повозможни и побрзи за остварување. Со само неколку клика...










Изменето од Анастеа - 25.Јануари.2015 во 01:14

за тоа дека децата се технолошки напредни... повеќе ми беше кажано во контекс на тоа што го зборите за фејсбук профили, секстинг... и кристално чисто да му објасниш се, и да му забраниш се, пак ќе се најде начин ако се сака... уствари имаш право, тука не се работи за технологија, туку за радозналост и способноста да се разбие

и јас како орка, немам деца и не намеравам да им наметнувам свои лични теории на луѓе кои имаат деца... НО, иако звучи егоистичо, секогаш се ставам себе како пример во овие дискусии
Јас никогаш не сум бил целосно отворен со родителите, и таков сум и денес, ама сепак сум испаднал ок
порнографија открив на 12 години, мастурбација кратко потоа, ама сепак испаднав ок
ја кога бев во овие години, немав ни интернет, ни смартфон, а фејсбук не беше уште измислен, ама затоа овие работи беа достапни во разни други форми
не ми требаше некое специјално посебно образование каде ти објаснуваат што е пенис а што вагина, за репродукција и за сексуално преносливи болести учевме по биологија и верувам дека уште се учи истото
...пробуваа и на мојата генерација да и упикуваат некои такви специјални едукации, ама како и секогаш во историјата на сексуалната едукација, се смеевме и си правевме вицови од тоа

тоа што сакав да го кажам, е дека некаде има потреба од специјални разговори, а некаде нема, нема психолошки шаблон со кој што може да се опфатат децата, и со или без надворешни влијанија, домашно воспитување и образование, од дете може да бидне било што
овие работи не се контролираат