Tоп 10 бајковити божиќни панаѓури во Европа

Официјално, празничната еуфорија може да започне! Декември е месец на традициите и божиќните саеми кои сите со нетрпение ги очекуваме.

Мали штандови, домашни празнични специјалитети, божиќна музика, топли пијалаци и празнична, магична атмосфера - што друго да посакате?

Ова се топ 10те божиќни саеми кои можете да ги посетите оваа зима:

Бремен, Германија

Мал, средовековен град кој изгледа баш како од бајките, со преку 170 мали штандови на кои се наоѓаат традиционални и старински предмети, вкусни специјалитети подготвени на оган, како и греено вино со различни ароми. Оваа година овој новогодишен саем се одржува од 28 ноември до 23 декември.

Единбург, Шкотска

Единбург оваа сезона е домаќин на 3 различни саеми кои се одржуваат од 22 ноември до 5 јануари. Она што е посебно и карактеристично за овие саеми се големиот број на активности кои ги имате на располагање - од лизгање на лед и романтично возење, па сè до прошетка низ божиќен лавиринт.

Колмар, Франција

Божиќниот саем во Колмар се одликува со прекрасна декорација, традиционални подароци и огромно лизгалиште. Самиот саем се простира на дури 5 плоштади и е еден од најосветлените во Франција. Отворен е од 22 ноември, па до Стара Нова година.

Прага, Чешка

Прага сама по себе е прекрасен град, но кога ќе дојде новогодишниот период неговата традиционална архитектура совршено се вклопува во божиќните саеми. Штандовите кои се поставени од 30 ноември до 23 декември, секоја година се преполни со украси, накит, свеќи, како и рачно изработени играчки за најмладите. Проследени со магични празнични мелодии, овој период од годината вреди да го доживеете токму во Прага.

Келн, Германија

Овој панаѓур е еден од најпосетуваните секоја година. Во неполн месец брои повеќе од 2 милиони посетители кои уживаат во штандовите поставени низ целиот град. Покрај традиционалните украси, тука може да се вкусат и традиционални германски специјалитети со празнична арома и вкус, започнувајќи од 25 ноември, па до 30 декември.

Koпенхаген, Данска

Илјадници светилки во новогодишни бои се распространети по централниот парк на Копенхаген во периодот од 1 до 31 декември. Мирисот на варено вино и палачинки со јаболка го исполнува воздухот, додека штандовите се преполни со божиќни декорации и вкусни специјалитети.

Бриж, Белгија

Ова романтично гратче дефинитивно заслужува место на оваа листа, заради осветленоста на саемот кој е сместен веднаш до големото лизгалиште, кое воедно е главна атракција. Во 30те минијатурни куќарки секој има можност да го купи за подарок она што ќе го посака. Доколку одите во Белгија пред 2 јануари, задолжително посетете го.

Инсбрук, Австрија

Австрискиот саем кој се одржува до 23 декември има посебен шмек и зимска атмосфера токму поради тоа што се наоѓа под падините на планините прекриени со снег. Уживањето во вареното вино и погледот кон белата идила е најдоброто зимско доживување. Надополнето  со декорациите и подароците кои се понудени на секој чекор, 70-те штандови во Инсбрук мора да ги посетите барем еднаш во животот.

Будимпешта, Унгарија

Главниот саем кој секоја година се одржува до 1 јануари е преполн со точно 100 штандови. На нив се наоѓаат играчки, украси, но и традиционална унгарска храна за сите гурмани. Осветлените околни градби и високи дрвја ја прават атмосферата незаменлива и неодолива!

Виена, Австрија

Најпознатиот европски саем е составен од дури 25 тематски одвоени саеми, кои се одржуваат на различни локации. Во Виена секоја година има поставено над 200 штандови кои ви нудат незаборавни сувенири и највкусни специјалитети. Тука празничната еуфорија завршува точно на 1 јануари.

Топ 5 најубави празнични панаѓури во светот

Декември штотуку пристигна, а веќе голем број од европските градови блеснаа во духот на празниците кои следуваат.

Речиси сите изгледаат како пресликани зимски бајки, па токму затоа за сите љубители на вареното вино и божиќните сувенири, ги одвојуваме најубавите 5 панаѓури за оваа зима:

1. Божиќен панаѓур Шварцвалд, Баден-Баден, Германија

Период на траење: 29.11 - 21.12.2014

Се наоѓа под импресивниот вијадукт во германскиот мистичен Шварцвалд, каде годишно привлекува по неколку илјадници посетители. Нуди единствена детска програма и тезги преполни со божиќни сувенири, па токму поради тоа е идеална празнична дестинација за сите семејства.

2. Божиќен панаѓур на езерото Милстатер, Австрија

Период на траење: 19.11 – 21.11.2014

На оддалеченост од 1 час од австрискиот град Вилах, се наоѓа езерото Милстатер кое е прекрасно, живописно место високо на Алпите. Опкружено е со високи снежни планини, а малото гратче во близина за време на празниците се претвора во вистинска божиќна бајка со сладок мирис на топли пијалаци.

3. Божиќен панаѓур на железничката станица во Цирих, Швајцарија

Период на траење: 20.11 – 24.12.2014

Еден од најнеобичните, но и најпознати панаѓури во светот, се одржува на магична локација - главната железничка станица во Цирих. Целата атмосфера е зачинета со над 150 божиќни тезги, а во централниот дел се наоѓа богато украсената новогодишна елка која секоја година мами илјадници љубопитни туристи.

4. Божиќен панаѓур во пештерата Велвет, Холандија

Период на траење: 14.11 – 23.11.2014

Овој божиќен панаѓур е еден од најстарите подземни во Европа, кој се одржува во огромната Велвет пештера. Оваа необична пештера е препознатлива по капелата од 18 век, која со многубројните новогодишни украси создава единствена празнична атмосфера.

5. Божиќен панаѓур во селото на Дедо Мраз, Рованиеми (Лапонија) во Финска

Период на траење: Отворен во текот на целата година

Селото на дедо мраз е отворено во текот на целата година и на посетителите им овозможува да уживаат во празничниот дух во било кој дел од годината. Во овој отворен музеј кој се протега на 400 метри квадратни, посетителите може да уживаат во сите божиќни традиции, додека децата имаат можност да ја посетат фабриката за детски играчки и да се сликаат со прекрасен Дедо Мраз.