Има антени кои емитуваат високофрекфентно (HF) радио зрачење. Овие антени кои се наоѓаат во близина на Гакон на Алјаска се користат за изучување на Јоносферата.Структурата на оваа статија е таква што ја нуди основната терминологија потребна за нашите читатели да донесат сами заклучок за поставеното прашање погоре и се до последната реченица самата статија не прави никаков заклучок од страна на авторот.

Што е Јоносферата и која е нејзината улога?
Јоносферата е слој од Земјината aтмосфера од 85-600 километри височина. Овој слој се наоѓа над озонската обвивка па сосема е логично дека е изложена на јаки бомбардирања со УВ и Х зраци од Сонцето. Поради јаките бомбардирања на зраците од Сонцето неутралните атоми испуштаат електрони при тоа создавајќи слободни електрони и позитивно наелектризирани јони. Како што густината на гасот не е преголема електроните се движат слободно пред по некое време повторно да се соединат со позитивните јони создавајќи повторно неутрален атом.


Овој циклус се повторува, неутралниот атом повторно се разградува на позитивно и негативно наелектризирање и така во круг.

Јоносферата има една одлична особина - поради големиот број на наелектризирани честици (јони и електрони) да ги одбива HF радио зраците назад кон Земјата.

Ова е многу значајно бидејќи токму тоа е принципот на работа на HF радио зраците кои го користат на пр. радио аматери. За успешна комуникација помеѓу Европа и Северна Америка потребно е Јоносферата да одбива HF радио бранови кон Земјата па Земјата назад кон Јоносферата најмалку пет пати. Меѓутоа за време на геомагнетната бура и периодот на интензивно бомбардирање на Земјата со сончевите зраци, Јоносферата трпи извесни промени кои можат да бидат такви што радио комуникацијата може да биде целосно оневозможена. Во центарот на истражување на HAARP проектот се наоѓа токму истражување и контрола на Јоносферата, со цел да се постигне подобра комуникација на радио брановите.

Како и каде се формираат циклоните?
Времето се формира во Тропосфератам а зависи од голем број параметри пред се градиенти (разлика) во притисокот, температурата и влажноста на воздухот. Тропосферата го претставува најнискиот слој на атмосферата на висина од 0-12 километри. Тропосферата е составена пред се од воедна пареа и аеросоли. Кога во Тропосферата ќе се појават области со низок воздушен притисок може да дојде до вртоложни струења на воздухот, од работ кон центарот со тенденција нееднаквите притисоци да се изедначат. Вака настануваат циклоните (како што беше циклонот Тамара кој предизвика пустош во Србија и Босна и Херцеговина). Циклоните обично се попратени со обилни ветрови и огромни количини на дожд.


Може ли HAARP да формира Циклон, а со самото тоа и да создаде катаклизмични врнежи на кои бевме сведоци?
На ова прашање одговорете сами! Размислете добро дали може систем од радио антени, дизајниран да влијае врз областа на Земјината атмосфера од 85 до 600 километри (Јоносферата) да влијае и врз појавите во Земјината атмосфера од 0 до 12 километри? Може ли радио предавателот да го промени воздушниот притисок па колку моќен и да бил? Може ли радиодифузерот како воки-токи да направи мешавина од вода, возух и дезодоранс (аеросолите) што поприлично добро го отсликува составот на Тропосферата?


За крај одговорете на прашањето: Може ли HAARP системот да има примена во воената индустрија? Секако дека може, со подобрувањето на сопствениот комуникациски систем, како и методите кои ја оневозможуваат комуникацијата помеѓу трета страна се стекнува огромна предност на теренот. HAARP е делумно финансиран од Американските воздухопловни сили, Американската морнарица и Одбранбената агенција за напредни истражувачки проекти, а такви проекти (ова е мислење од прва рака) секогаш имаат еден дел таен карактер поврзан со воени истражувања (пред се во случај HAARP да работи на подобрување на комуникацијата помеѓу подморници на големи длабочини).

Но се чини дека едноставно нема ниту минимална шанса систем како што е HAARP да предизвика и најмало влијание на временските промени.